Rossiyaning Ukrainadagi harbiy amaliyoti fonida yuzaga kelgan Yevropadagi energetika inqirozi tufayli Gretsiya “juda qattiq qish”ga tayyorlanishi kerak. Bu haqda mamlakat bosh vaziri Kiriakos Mitsotakis 86-xalqaro ko‘rgazma ochilishida aytib o‘tdi.
Uning tushuntirishicha, gaz narxi o‘n baravar ko‘tarilsa, hech bir hukumat bunday o‘sishni to‘xtata olmaydi va bu muqarrar ravishda fuqarolarga ta’sir qiladi. Shu bilan birga, Mitsotakis Gretsiya qiyinchiliklarga qaramay, Ukrainani qo‘llab-quvvatlashda davom etishini ta’kidladi.
Bosh vazir aholini qo‘llab-quvvatlash bo‘yicha rejalashtirilgan chora-tadbirlarni ham ma’lum qildi. Ular orasida aholining ijtimoiy himoyaga muhtoj toifasidan bo‘lgan 2,3 million fuqaro uchun dekabr oyida 250 yevrodan to‘lab berish bor. Bundan tashqari, nafaqalar, pensiyalar ko‘tariladi, tadbirkorlikni rag‘batlantirish, eng kam ish haqi miqdorini oshirish (2023-yil 1-maydan) va boshqa choralar ko‘riladi.
Yevropada gaz narxi Rossiyaga qarshi sanksiyalar fonida, shuningdek, Rossiyadan gaz yetkazib berishning sezilarli darajada qisqarishi sabab oshib bormoqda. Agar bu o‘sish tendensiyasi davom etsa, qishda yonilg‘i narxi, konservativ hisob-kitoblarga ko‘ra, har 1000 kub metr uchun 4000 dollardan oshadi.
Izoh (0)