Rossiya Mudofaa vazirligi jurnalistlar uchun kundalik brifingda 11-sentabr holatiga ko‘ra, Ukrainaning Xarkov viloyatidagi qaysi hududlar Rossiya qo‘shinlari tomonidan nazorat qilinayotganini ko‘rsatdi.
Taqdim etilgan xaritadan ma’lum bo‘lishicha, Xarkov viloyatining sharqida, Oskol daryosi bo‘ylab kichik bir hudud Rossiya nazorati ostida bo‘lib turibdi (bu hudud pushti rang bilan belgilangan).
Avvalgi kuni, 10-sentabrdagi brifingda ko‘rsatilgan xarita bilan solishtirganda, Rossiya harbiylari Xarkov viloyati shimolidan chekinganini, xususan, Rossiya bilan chegaradagi Volchansk shahrini tark etganini ko‘rish mumkin (u yerni rus armiyasi urushning birinchi kunida egallagan edi). Volchanskda allaqachon Ukraina bayrog‘i paydo bo‘lgan.
Sentabr oyi boshida Ukraina armiyasi Xarkov viloyatiga qarshi hujumga o‘tdi, shundan so‘ng rus qo‘shinlari chekinishni boshladi. Rossiya Mudofaa vazirligi chekinishga izoh berar ekan, “Donetsk yo‘nalishidagi sa’y-harakatlarni kuchaytirish” uchun Xarkov viloyatidan “qo‘shinlarni qisqartirish va ko‘chirish operatsiyasi” bo‘layotganini e’lon qildi. 11-sentabr kuni Xarkov viloyati rahbari Oleg Sinegubov Ukraina harbiylari mintaqadagi 40 dan ortiq aholi punktlarini ozod qilganini aytdi.
11-sentabr kuni Ukraina Qurolli kuchlari bosh qo‘mondoni Valeriy Zalujniy sentabr boshidan beri Ukraina armiyasi mamlakatning uch ming kvadrat kilometrdan ortiq hududini qaytarib olganini ma’lum qildi. Amerika Urushni o‘rganish instituti (ISW) ma’lumotlariga ko‘ra, bu Rossiya armiyasi aprel oyidan beri okkupatsiya qilgan hududlardan ko‘p.
Izoh (0)