Yevropa Ittifoqi va UNICEF vazirliklar va idoralar, shuningdek, Surxondaryo viloyati hokimiyat organlari bilan hamkorlikda mahallalarda bolalar, yoshlar, oilalar uchun ko‘rsatiladigan ijtimoiy xizmatlarni yaxshilashni qo‘llab-quvvatlaydi. Bu haqda Yevropa Ittifoqining O‘zbekistondagi delegatsiyasi xabar qildi.
Ta’kidlanishicha, Oila va xotin-qizlar davlat qo‘mitasi, Surxondaryo viloyati hokimligi, Yevropa Ittifoqi va UNICEF hamkorligida Surxondaryo viloyatida inklyuziv ta’lim, ijtimoiy xizmatlar va huquqiy yordamdan foydalanish imkoniyatlarini kengaytirish dasturi ishga tushirildi.
Yevropa Ittifoqining dasturga hissasi 1 600 000 yevroni (taxminan 17 milliard so‘mni) tashkil qiladi. UNICEF vazirliklar va viloyat hokimiyat organlari bilan hamkorlikda taxminan 35 000 kishini qamrab olishni rejalashtirmoqda. Dasturda asosiy e’tibor bir qator sabablarga ko‘ra, jumladan, zo‘ravonlik, migratsiya, Afg‘onistondan ko‘chishga majbur bo‘lgani bois qiyin hayotiy ahvolda bo‘lgan bolalar, yoshlar va oilalarga qaratiladi.
“Bu o‘zaro hamkorlik, integratsiyalashuv va birdamlik uchun umumiy makonlarni yaratish orqali mahalliy hamjamiyat, jumladan, afg‘on xalqining ijtimoiy hamjihatligi va farovonligini oshirishga qaratilgan ko‘p bosqichli strategiyaga ega muhim voqeadir. Shu tariqa Yevropa Ittifoqi O‘zbekistonni hamda uning kuchli va barqaror jamiyat qurish yo‘lidagi sa’y-harakatlarini, shuningdek, yordamga muhtoj afg‘onlar, jumladan, qo‘shni davlatlardagilarni qo‘llab-quvvatlashini bildiradi”, — dedi Yevropa Ittifoqining O‘zbekistondagi elchisi Sharlotta Adrian.
“Mahalliy hamjamiyatlarda yashovchilarning barchasi, ayniqsa, eng zaiflari, ijtimoiy va huquqiy yordam xizmatlaridan teng foydalanish imkoniga ega bo‘lsa, hamjamiyatlar hamjihat, barqaror va farovon bo‘ladi. Muhimi, mahallalar davlat tomonidan kafolatlangan sifatli asosiy xizmatlarga ega bo‘lsalar, ular tashqi ta’sirlar va zaifliklarga chidamli bo‘lib boradi”, — dedi UNICEFning O‘zbekistondagi vakolatxonasi rahbari Munir Mamedzade.
Grant doirasida ijtimoiy adolatni ilgari surishda bevosita ishtirok etuvchi ijtimoiy xizmat xodimlarining salohiyatini kuchaytirishga alohida e’tibor qaratiladi. Dastur, shuningdek, ko‘p tilli maktabgacha va maktab inklyuziv ta’limi komponentlarini, ixtisoslashtirilgan yuridik yordam xizmatlarini va tanlangan guruh yoshlari uchun ko‘nikmalarni rivojlantirish dasturini o‘z ichiga oladi.
Izoh (0)