Европа Иттифоқи ва UNICEF вазирликлар ва идоралар, шунингдек, Сурхондарё вилояти ҳокимият органлари билан ҳамкорликда маҳаллаларда болалар, ёшлар, оилалар учун кўрсатиладиган ижтимоий хизматларни яхшилашни қўллаб-қувватлайди. Бу ҳақда Европа Иттифоқининг Ўзбекистондаги делегацияси хабар қилди.
Таъкидланишича, Оила ва хотин-қизлар давлат қўмитаси, Сурхондарё вилояти ҳокимлиги, Европа Иттифоқи ва UNICEF ҳамкорлигида Сурхондарё вилоятида инклюзив таълим, ижтимоий хизматлар ва ҳуқуқий ёрдамдан фойдаланиш имкониятларини кенгайтириш дастури ишга туширилди.
Европа Иттифоқининг дастурга ҳиссаси 1 600 000 еврони (тахминан 17 миллиард сўмни) ташкил қилади. UNICEF вазирликлар ва вилоят ҳокимият органлари билан ҳамкорликда тахминан 35 000 кишини қамраб олишни режалаштирмоқда. Дастурда асосий эътибор бир қатор сабабларга кўра, жумладан, зўравонлик, миграция, Афғонистондан кўчишга мажбур бўлгани боис қийин ҳаётий аҳволда бўлган болалар, ёшлар ва оилаларга қаратилади.
«Бу ўзаро ҳамкорлик, интеграциялашув ва бирдамлик учун умумий маконларни яратиш орқали маҳаллий ҳамжамият, жумладан, афғон халқининг ижтимоий ҳамжиҳатлиги ва фаровонлигини оширишга қаратилган кўп босқичли стратегияга эга муҳим воқеадир. Шу тариқа Европа Иттифоқи Ўзбекистонни ҳамда унинг кучли ва барқарор жамият қуриш йўлидаги саъй-ҳаракатларини, шунингдек, ёрдамга муҳтож афғонлар, жумладан, қўшни давлатлардагиларни қўллаб-қувватлашини билдиради», — деди Европа Иттифоқининг Ўзбекистондаги элчиси Шарлотта Адриан.
«Маҳаллий ҳамжамиятларда яшовчиларнинг барчаси, айниқса, энг заифлари, ижтимоий ва ҳуқуқий ёрдам хизматларидан тенг фойдаланиш имконига эга бўлса, ҳамжамиятлар ҳамжиҳат, барқарор ва фаровон бўлади. Муҳими, маҳаллалар давлат томонидан кафолатланган сифатли асосий хизматларга эга бўлсалар, улар ташқи таъсирлар ва заифликларга чидамли бўлиб боради», — деди UNICEFнинг Ўзбекистондаги ваколатхонаси раҳбари Мунир Мамедзаде.
Грант доирасида ижтимоий адолатни илгари суришда бевосита иштирок этувчи ижтимоий хизмат ходимларининг салоҳиятини кучайтиришга алоҳида эътибор қаратилади. Дастур, шунингдек, кўп тилли мактабгача ва мактаб инклюзив таълими компонентларини, ихтисослаштирилган юридик ёрдам хизматларини ва танланган гуруҳ ёшлари учун кўникмаларни ривожлантириш дастурини ўз ичига олади.
Изоҳ (0)