38 yoshli yaponiyalik Shoji Morimoto juda noodatiy ijara bilan shug‘ullanadi. U mijozlarga ma’lum vaqt ularning yonida bo‘lish xizmatini taqdim qiladi.
"Men mijozlar bilan ular boradigan joylarga boraman. Birga o‘tirib, yeb-ichaman. Lekin hech narsa qilmayman. Shunchaki ularning oddiy savollariga javob berib o‘tiraman", - deydi Morimoto.
2018-yilda Twitter’dagi sahifasida o‘z xizmatini taklif qilish orqali biznesini boshlaganidan beri Morimoto 4000 martadan ko‘proq ijarga olinganini ta’kidladi.
Morimoto hozirda Twitterda 250 mingga yaqin obunachilarga ega. Mijozlarining taxminan chorak qismi uni bir necha marta ijaraga olgan.
Jumladan, bir ayol “hech narsa qilmasdan uni eshitib o‘tirish uchun” Morimotoni 270 marta yollagan. Noodatiy ijara narxi 10 000 iyen (taxminan 71 AQSH dollari) turadi.
Morimotoni ijaraga oladiganlar uning transport xarajatlarini ham to‘lab berishlari kerak. Shuningdek, suhbat kafe yoki restoranda bo‘lsa, ovqatlanish xarajati ham mijoz bo‘ynida bo‘ladi.
Shunga qaramay, Morimotoga talab yuqori, u ba'zan kuniga uchtagacha buyurtma olishi mumkin. Mijozlardan biri Aruna Chida bo'lib, u Morimoto haqida uning biznesi ijtimoiy tarmoqlarda mashhur bo'lganidan so‘ng xabar topgan.
"Do'stlarim bilan birga bo'lganimda, o'zimni ularning ko'nglini ovlashga majburdek his qilaman. Lekin "Janob Rental" (Morimoto) bilan men xotirjamman. Istalgan vaqtda gapirishim yoki butunlay sukut saqlashim mumkin. Gapirsam, u gaplarimni diqqat bilan eshitadi”, - dedi Chida.
Morimoto bundan avval nashriyotda ishlagan. Ko'pincha rahbar va hamkasblar tomonidan hech narsa qilmagani uchun tanqid qilingan.
"Men "hech narsa qilmaslik" xususiyatimdan foydalanib, uni biznes rejaga aylantirishni o‘yladim. Shunday qilib, men hech narsa qilmaslik sharti bilan o‘zimni ijaraga berishni boshladim” - deydi Morimoto.
Nima uchun uning xizmati bunchalik mashhur bo'lib ketgan?
Marimotoning aytishicha, mijozlar u bilan bo'lgan "vaqtinchalik munosabatlar" paytda o‘zlarini erkin va qulay his qilishadi.
Bunday munosabatlar har ikki tomonga hech qanday majburiyat yuklamaydi.
Do'stlari, oilalari va tanishlari bilan muloqotda odamlarda doimo mas'uliyat hissi saqlanib turadi. Morimoto taklif qilayotgan "munosabatlar"da esa hech qanday mas'uliyat yo‘q.
Bundan tashqari, Morimoto uning ishi jamiyatdagi munosabatlarni o'zgartirishi mumkin, degan fikrda.
“Insonga o‘zini qadrlanayotganini his qildirish uchun har doim ham uning biror yumushini bajarib berish shart emas. Ba'zan o‘sha insonning shunchaki yonida bo‘lish bunga yetarli bo'lishi mumkin”, - deydi Morimoto.
Izoh (0)