24-fevraldan 24-avgustgacha Rossiya qazilma yonilg‘i eksportidan qariyb 158 milliard yevro daromad olgan, deb yozadi Meduza. 6-sentabr holatiga Yevroittifoq mamlakatlari Rossiya yonilg‘isini sotib olishga 87,5 milliarddan ortiq mablag‘ sarf qilgan. Bu haqda CREA (Energiya va toza havo tadqiqotlari markazi) mustaqil xalqaro tashkiloti ma’lum qildi.
Tashkilot ma’lumotlariga ko‘ra, Rossiya qazilma yonilg‘isining boshqa eng yirik importchilari Xitoy (34,9 milliard yevro), Turkiya (10,7 milliard yevro), Hindiston (6,6 milliard yevro), Yaponiya (2,5 milliard yevro), Misr (2,3 milliard yevro) va Janubiy Koreya (2 milliard yevro) hisoblanadi.
CREA yetkazib berish hajmlari kamayganiga qaramasdan, Rossiya talafotlarni qazilma yonilg‘ining oshgan narxlari hisobiga qoplayotganiga e’tibor qaratdi, buning sharofati bilan mamlakatning joriy daromadlari avvalgi yillarnikidan ancha yuqoridir.
Shu bilan birga, deb qayd etadi Bloomberg Rossiya hukumatining yopiq ma’ruzasiga tayanib, Yevropaga gaz yetkazib berish hajmining qisqargani Rossiyaga kuniga bir milliard rublga tushmoqda, uning butunlay to‘xtatilishi esa budjetga yiliga 400 milliard olinmay qolgan soliq tushumlariga teng bo‘lishi mumkin. Bundan tashqari, ma’ruzada aytilishicha, Yevroittifoqning Rossiya nefti va gazidan keskin voz kechishi Rossiyaning o‘z bozorini ta’minlash qobiliyatiga zarba berishi mumkin.
Sentabr boshida “Katta yettilik” mamlakatlari Rossiya neftining narx chegarasiga nisbatan kelishuvga erishgan edi. Shu bilan taxminan bir vaqtda Yevrokomissiya rahbari Ursula fon der Lyayyen Rossiya gaziga nisbatan narxning eng yuqori nuqtasini joriy etish rejasi haqida e’lon qildi.
6-sentabr kuni Yevrokomissiya tomonidan taklif etilayotgan cheklovlarning ikkita varianti ma’lum bo‘ldi. Birinchi variant Rossiya gazi uchun narxning eng yuqori nuqtasini butun Yevroittifoq hududida joriy qilishni ko‘zda tutadi, ikkinchi variant esa Yevroittifoqqa a’zo mamlakatlarni “qizil” (cheklov amal qiladigan) va “yashil” (narxlar “ancha baland” bo‘lib qoladigan) zonalarga bo‘lishni nazarda tutadi.
Sanksiyalarning oltinchi paketi doirasida Yevroittifoq Rossiya nefti va neft mahsulotlaridan bosqichma-bosqich voz kechish rejasini kelishib olgandi. Shu bilan birga, cheklovlar neftni quvurlar orqali yetkazib berish uchun amal qilmaydi.
Izoh (0)