Vengriya Yevroittifoqdan Alisher Usmonov va yana ikki nafar rossiyalik biznesmenga nisbatan sanksiyalarni bekor qilishni so‘radi

Vengriya Yevroittifoqqa murojaat qilib, sanksiya ro‘yxatlaridan rossiyalik uch nafar tadbirkor — USM Holdings asoschisi Alisher Usmonov, “Alfa-grupp” egalaridan biri Pyotr Aven va Magnitogorsk metallurgiya kombinati egasi Viktor Rashnikovni chiqarib tashlashni so‘ragan, deb yozadi Meduza. Bu haqda Politico yevropalik diplomatlarga tayanib xabar bergan.

Jurnalistlar suhbatdoshlariga ko‘ra, buning evaziga Budapesht urush boshlanganidan keyin Yevroittifoq tomonidan Rossiyaga qarshi kiritilgan sanksiyalar uzaytirilishiga qarshi chiqmaslikka va’da bergan.

Shuningdek, Vengriya gumanitar tashkilotlarga sanksiyalar ta’siriga uchragan Rossiya banklarining ba’zilari bilan aloqani saqlash imkoniyatini taqdim etishni talab qilmoqda.

Diplomatik manbalar da’vo qilishicha, Budapeshtning pozitsiyasi ba’zi Yevroittifoq mamlakatlarida “g‘azabni keltirib chiqargan”. Bundan tashqari, yevropalik mansabdorlar Vengriya shu tariqa Rossiyaga qarshi sanksiyalarni aylanib o‘tish uchun “tuynuklar” yaratishga urinayotganidan xavfsiramoqda.

Sanksiya qonunchiligiga muvofiq, Yevroittifoq Rossiyaga qarshi fevral oxirida kiritilgan sanksiyalarning amal qilish muddatini 15-sentabrgacha uzaytirishi kerak. Vengriya o‘z pozitsiyasini bildirguniga qadar sanksiyalarning uzaytirilishi rasmiy jarayon sifatida ko‘rilayotgan edi. Endi esa Budapeshtning iltimosi 7-sentabr kuni Yevroittifoq vakillari majlisida alohida muhokama qilinishi kerak.

USM Holdings asoschisi, milliarder Alisher Usmonov 28-fevral kuni, Ukrainada Rossiya operatsiyasi boshlanganidan keyin to‘rt kun o‘tib, Yevroittifoq sanksiyalariga uchragan edi. Biznesmen Bryusselning bu qaroridan norozi bo‘lib, may boshida Yevropa umumiy yurisdiksiya sudiga apellyatsiya berdi. U suddan apellyatsiya bo‘yicha yakuniy qaror qabul qilinguniga qadar sanksiyalar amal qilishini to‘xtatib qo‘yishni so‘radi. Usmonovga qarshi AQSH, Kanada, Buyuk Britaniya va Yaponiya ham sanksiyalar kiritgan.

May oyining ikkinchi yarmida Usmonov The Times gazetasi talqini bo‘yicha Buyuk Britaniyaning eng badavlat odamlari o‘nligidan chiqib ketdi.