Япониялик эркак антиқа ижара турини йўлга қўйди. У ҳеч нарса қилмаслик шарти билан ўзини ижарага беради (видео)

38 ёшли япониялик Шожи Моримото жуда ноодатий ижара билан шуғулланади. У мижозларга маълум вақт уларнинг ёнида бўлиш хизматини тақдим қилади.

"Мен мижозлар билан улар борадиган жойларга бораман. Бирга ўтириб, еб-ичаман. Лекин ҳеч нарса қилмайман. Шунчаки уларнинг оддий саволларига жавоб бериб ўтираман", - дейди Моримото.

2018 йилда Twitter’даги саҳифасида ўз хизматини таклиф қилиш орқали бизнесини бошлаганидан бери Моримото 4000 мартадан кўпроқ ижарга олинганини таъкидлади.

Моримото ҳозирда Twitterда 250 мингга яқин обуначиларга эга. Мижозларининг тахминан чорак қисми уни бир неча марта ижарага олган.

Жумладан, бир аёл «ҳеч нарса қилмасдан уни эшитиб ўтириш учун» Моримотони 270 марта ёллаган. Ноодатий ижара нархи 10 000 иен (тахминан 71 АҚШ доллари) туради.

Моримотони ижарага оладиганлар унинг транспорт харажатларини ҳам тўлаб беришлари керак. Шунингдек, суҳбат кафе ёки ресторанда бўлса, овқатланиш харажати ҳам мижоз бўйнида бўлади.

Шунга қарамай, Моримотога талаб юқори, у баъзан кунига учтагача буюртма олиши мумкин. Мижозлардан бири Аруна Чида бўлиб, у Моримото ҳақида унинг бизнеси ижтимоий тармоқларда машҳур бўлганидан сўнг хабар топган.

"Дўстларим билан бирга бўлганимда, ўзимни уларнинг кўнглини овлашга мажбурдек  ҳис қиламан. Лекин "Жаноб Рентал" (Моримото) билан мен хотиржамман. Исталган вақтда гапиришим ёки бутунлай сукут сақлашим мумкин. Гапирсам, у гапларимни диққат билан эшитади», - деди Чида.

Моримото бундан аввал нашриётда ишлаган. Кўпинча раҳбар ва ҳамкасблар томонидан ҳеч нарса қилмагани учун танқид қилинган.

"Мен "ҳеч нарса қилмаслик" хусусиятимдан фойдаланиб, уни бизнес режага айлантиришни ўйладим. Шундай қилиб, мен ҳеч нарса қилмаслик шарти билан ўзимни ижарага беришни бошладим» - дейди Моримото.

Нима учун унинг хизмати бунчалик машҳур бўлиб кетган?

Маримотонинг айтишича, мижозлар у билан бўлган "вақтинчалик муносабатлар" пайтда ўзларини эркин ва қулай ҳис қилишади.

Бундай муносабатлар ҳар икки томонга ҳеч қандай мажбурият юкламайди.

Дўстлари, оилалари ва танишлари билан мулоқотда одамларда доимо масъулият ҳисси сақланиб туради. Моримото таклиф қилаётган "муносабатлар"да эса ҳеч қандай масъулият йўқ.

Бундан ташқари, Моримото унинг иши жамиятдаги муносабатларни ўзгартириши мумкин, деган фикрда.

«Инсонга ўзини қадрланаётганини ҳис қилдириш учун ҳар доим ҳам унинг бирор юмушини бажариб бериш шарт эмас. Баъзан ўша инсоннинг шунчаки ёнида бўлиш бунга етарли бўлиши мумкин», - дейди Моримото.