Yangiyo‘lda daraxtlarning tag qismi betonlab tashlangani aniqlandi

Ijtimoiy tarmoqlarda Toshkent viloyati Yangiyo‘l shahrida tag qismi betonlab tashlangan daraxtlar tasviri aks etgan xabar tarqaldi. Davlat ekologiya qo‘mitasi holatga munosabat bildirdi.

Qayd etilishicha, holat yuzasidan Yangiyo‘l shahar ekologiya bo‘limi xodimlari o‘rganish ishlarini olib borgan. O‘rganishlar davomida mazkur hududdagi daraxtlarning ost qismi bundan bir necha kun oldin betonlab tashlangani aniqlangan.

Foto: Davlat ekologiya qo‘mitasi

Daraxtlarning ost qismi betonlardan tozalanib, unumdor tuproq to‘kilgan va sug‘orilgan. Bunday holatlar qayta sodir etilmasligi uchun yashovchilar o‘rtasida tushuntirish ishlari olib borilgan.