Toshkentda ombor mudiri va ta’minotchisi o‘zi ishlaydigan joydan 40 276 dollarlik telefonlarni talon-toroj qilgani aniqlandi

Toshkentning Yashnabod va Mirobod tumanlarida tadbirkorlarning mulkini o‘zlashtirgan shaxslar aniqlandi, deb xabar bermoqda Bosh prokuratura huzuridagi departament.

Departamentning Yashnobod tuman bo‘limi tomonidan tadbirkorlik subyektlarining huquqlarini himoya qilish yuzasidan o‘tkazilgan tergovga qadar tekshiruvda, “P.G.” MCHJ ombor mudiri A.Z. va ta’minotchisi R.S. o‘zlarining moddiy javobgarligidagi 40 276 dollarlik uyali aloqa vositalarini o‘zlashtirish yo‘li bilan talon-toroj qilgani aniqlangan.

Shu kabi Mirobod tuman bo‘limi tomonidan o‘tkazilgan tergovga qadar tekshiruvda, “W.B.” MCHJ rahbari I.X. “C-T.” MCHJning menejeri S.ning ishonchiga kirib, unga “Moy Agent” tizimi orqali aviachiptalarni sotish bilan shug‘ullanishini aytib, “S-G” MCHJga tegishli aviachiptalarni 47 nafar fuqaroga sotib yuborib, jami 161,8 million so‘mni firibgarlik yo‘li bilan qo‘lga kiritgani aniqlangan.

Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.