Тошкентда омбор мудири ва таъминотчиси ўзи ишлайдиган жойдан 40 276 долларлик телефонларни талон-торож қилгани аниқланди

Тошкентнинг Яшнабод ва Миробод туманларида тадбиркорларнинг мулкини ўзлаштирган шахслар аниқланди, деб хабар бермоқда Бош прокуратура ҳузуридаги департамент.

Департаментнинг Яшнобод туман бўлими томонидан тадбиркорлик субъектларининг ҳуқуқларини ҳимоя қилиш юзасидан ўтказилган терговга қадар текширувда, «П.Г.» МЧЖ омбор мудири А.З. ва таъминотчиси Р.С. ўзларининг моддий жавобгарлигидаги 40 276 долларлик уяли алоқа воситаларини ўзлаштириш йўли билан талон-торож қилгани аниқланган.

Шу каби Миробод туман бўлими томонидан ўтказилган терговга қадар текширувда, «W.B.» МЧЖ раҳбари И.Х. «C-Т.» МЧЖнинг менежери С.нинг ишончига кириб, унга «Мой Агент» тизими орқали авиачипталарни сотиш билан шуғулланишини айтиб, «С-Г» МЧЖга тегишли авиачипталарни 47 нафар фуқарога сотиб юбориб, жами 161,8 миллион сўмни фирибгарлик йўли билан қўлга киритгани аниқланган.

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.