Pentagon Rossiya Shimoliy Koreyadan qurol olgani va undan Ukrainadagi harbiy amaliyotlarda foydalanayotgani haqida dalillar keltira olmaydi. Bu haqda Oq uyning milliy xavfsizlik bo‘yicha vakili Jon Kirbi ma’lum qildi.
“Ushbu xarid tugallangani haqida hech qanday ma’lumot yo‘q va albatta, bu qurollar Ukraina hududida qo‘llanilayotganiga ham biror ishora mavjud emas”, — dedi u.
Kirbi “millionlab snaryad va raketalar” sotib olinishini haqiqatga yaqin deb ta’rifladi hamda bu ma’lumotlar “Rossiya prezidenti Vladimir Putinning qanchalik umidsizlikka tushganidan” dalolat berishini aytdi.
6-sentabr kuni The New York Times va Associated Press agentliklari AQSH razvedkasi ma’lumotlariga tayanib, Rossiya Shimoliy Koreyadan “millionlab artilleriya snaryadlari va raketalar” sotib olayotgani haqida xabar berdi.
Hozircha jurnalistlar bu haqdagi ma’lumotni mustaqil manbalari orqali tekshirib ko‘rish imkoniyatiga ega emas, deb yozadi The New York Times.
Shimoliy Koreya texnikasini xarid qilganlik to‘g‘risidagi razvedka ma’lumotlari Rossiya Eronning zarbdor uchuvchisiz uchar qurilmalarini sotib olgani ma’lum bo‘lganidan keyin bir hafta o‘tib oshkor etildi. Shu bilan birga, The Washington Post manbalari ma’lumotlariga ko‘ra, dastlabki sinovlar chog‘ida Eron uchuvchisiz qurilmalari bir necha marta ishdan chiqqan, bundan “rossiyaliklar norozi bo‘lgan”.
The New York Times qayd etishicha, Eron va Shimoliy Koreya tomonidan qurol-yarog‘ yetkazib berilayotgani Rossiyaning o‘z qurol-yarog‘ zaxiralari tugab bitganidan darak berishi mumkin.
Izoh (0)