Пентагон Россия Шимолий Кореядан қурол олгани ва ундан Украинадаги ҳарбий амалиётларда фойдаланаётгани ҳақида далиллар келтира олмайди. Бу ҳақда Оқ уйнинг миллий хавфсизлик бўйича вакили Жон Кирби маълум қилди.
«Ушбу харид тугаллангани ҳақида ҳеч қандай маълумот йўқ ва албатта, бу қуроллар Украина ҳудудида қўлланилаётганига ҳам бирор ишора мавжуд эмас», — деди у.
Кирби «миллионлаб снаряд ва ракеталар» сотиб олинишини ҳақиқатга яқин деб таърифлади ҳамда бу маълумотлар «Россия президенти Владимир Путиннинг қанчалик умидсизликка тушганидан» далолат беришини айтди.
6 сентябрь куни The New York Times ва Associated Press агентликлари АҚШ разведкаси маълумотларига таяниб, Россия Шимолий Кореядан «миллионлаб артиллерия снарядлари ва ракеталар» сотиб олаётгани ҳақида хабар берди.
Ҳозирча журналистлар бу ҳақдаги маълумотни мустақил манбалари орқали текшириб кўриш имкониятига эга эмас, деб ёзади The New York Times.
Шимолий Корея техникасини харид қилганлик тўғрисидаги разведка маълумотлари Россия Эроннинг зарбдор учувчисиз учар қурилмаларини сотиб олгани маълум бўлганидан кейин бир ҳафта ўтиб ошкор этилди. Шу билан бирга, The Washington Post манбалари маълумотларига кўра, дастлабки синовлар чоғида Эрон учувчисиз қурилмалари бир неча марта ишдан чиққан, бундан «россияликлар норози бўлган».
The New York Times қайд этишича, Эрон ва Шимолий Корея томонидан қурол-яроғ етказиб берилаётгани Россиянинг ўз қурол-яроғ захиралари тугаб битганидан дарак бериши мумкин.
Изоҳ (0)