Turkmaniston Pokiston xalqiga gumanitar yordam jo‘natmoqda. Turkmaniston prezidenti Serdar Berdimuhamedov Qishloq xo‘jaligi vazirligi, To‘qimachilik sanoati vazirligi, Sog‘liqni saqlash vazirligi hamda Turkmaniston sanoatchilar va tadbirkorlar uyushmasiga ushbu mamlakatga bepul gumanitar yordam yetkazish bo‘yicha ko‘rsatma berdi, deb yozmoqda “Xronika Turkmenistana”.
Gumanitar yordam Turkmaniston Tashqi ishlar vazirligi tomonidan sentabr oyida jo‘natilishi kerak. Yuklar tarkibidan dori-darmon va tibbiy buyumlar, shuningdek, tovar va oziq-ovqatlar joy oladi.
Avgust oyi oxirida Pokistonda so‘nggi o‘n yilliklardagi eng kuchli yog‘ingarchiliklar kuzatildi va bu kuchli suv toshqinlariga olib keldi. Tabiiy ofat qurbonlari soni 1,2 ming kishidan oshdi. Umumiy hisobda 33,4 million kishi toshqindan jabr ko‘rgan. Pokiston qishloq xo‘jaligi yerlarining qariyb 45 foizi suv ostida qolgan. Dastlabki hisob-kitoblarga ko‘ra, zarar 10 milliard dollarni tashkil qiladi.
O‘zbekiston ham Pokistonga 1-sentabr kuni 40 tonna insonparvarlik yordami jo‘natgan edi. Oziq-ovqat mahsulotlari, shu jumladan, o‘simlik yog‘i, un, guruch, go‘sht konservalari, qandolat va makaron mahsulotlari, shuningdek, to‘qimachilik mahsulotlari va boshqa tovarlardan iborat qariyb 40 tonna yuk harbiy samolyot orqali Islomobodga yetkazilgan.
Izoh (0)