Rossiya prezidenti Vladimir Putin fursati kelganida Donbassga boradi, deya ma’lum qildi davlat rahbari matbuot kotibi Dmitriy Peskov Sharqiy iqtisodiy forum doirasida.
“Prezidentning u yerga safariga kelsak, o‘z vaqti kelganida bunday safar amalga oshishiga shubha qilmayman”, — dedi Peskov.
Shuningdek, prezident matbuot kotibi Ukrainada maxsus harbiy operatsiya o‘tkazilishi munosabati bilan Rossiya jamiyatida alohida qutblashish yuzaga kelganini ko‘rmayotganini aytdi. “Faqat jamiyatning birlashuvi haqida gapirish mumkin”, — dedi u.
Bundan tashqari, Peskov Donbassni rivojlantirish bo‘yicha keng ko‘lamli rejalar haqida ma’lum qildi. “Qurilish olib borilyapti, yangi obyektlar barpo etilyapti, hayotiy ta’minotning barcha tizimlarini qayta tiklash bo‘yicha qizg‘in sa’y-harakatlar olib borilmoqda. Bu ham suv quvurlari, ham energiya ta’minoti, ijtimoiy obyektlar. Faol ishlar olib borilmoqda va u yerda ko‘p-ko‘p minglab odamlar ishlayapti. Shubhasiz, bu davom etadi”, — dedi u.
Harbiy operatsiya boshlanganidan buyon Donbassga ko‘plab rossiyalik siyosatchilar va mansabdorlar, shu jumladan, Xavfsizlik kengashi raisi o‘rinbosari Dmitriy Medvedev, Federatsiya kengashi birinchi vitse-spikeri Andrey Turchak, prezident administratsiyasi rahbari birinchi o‘rinbosari Sergey Kiriyenko borib kelgan edi.
Izoh (0)