Туркманистон Покистон халқига гуманитар ёрдам жўнатмоқда. Туркманистон президенти Сердар Бердимуҳамедов Қишлоқ хўжалиги вазирлиги, Тўқимачилик саноати вазирлиги, Соғлиқни сақлаш вазирлиги ҳамда Туркманистон саноатчилар ва тадбиркорлар уюшмасига ушбу мамлакатга бепул гуманитар ёрдам етказиш бўйича кўрсатма берди, деб ёзмоқда «Хроника Туркменистана».
Гуманитар ёрдам Туркманистон Ташқи ишлар вазирлиги томонидан сентябрь ойида жўнатилиши керак. Юклар таркибидан дори-дармон ва тиббий буюмлар, шунингдек, товар ва озиқ-овқатлар жой олади.
Август ойи охирида Покистонда сўнгги ўн йилликлардаги энг кучли ёғингарчиликлар кузатилди ва бу кучли сув тошқинларига олиб келди. Табиий офат қурбонлари сони 1,2 минг кишидан ошди. Умумий ҳисобда 33,4 миллион киши тошқиндан жабр кўрган. Покистон қишлоқ хўжалиги ерларининг қарийб 45 фоизи сув остида қолган. Дастлабки ҳисоб-китобларга кўра, зарар 10 миллиард долларни ташкил қилади.
Ўзбекистон ҳам Покистонга 1 сентябрь куни 40 тонна инсонпарварлик ёрдами жўнатган эди. Озиқ-овқат маҳсулотлари, шу жумладан, ўсимлик ёғи, ун, гуруч, гўшт консервалари, қандолат ва макарон маҳсулотлари, шунингдек, тўқимачилик маҳсулотлари ва бошқа товарлардан иборат қарийб 40 тонна юк ҳарбий самолёт орқали Исломободга етказилган.
Изоҳ (0)