Xitoyning Chunsin shahrida Aedas me’morchilik studiyasi loyihasi asosida qayrilma fasadga ega Dance of Light (“Yorug‘lik raqsi”) osmono‘par ofis binosi foydalanishga topshirildi, deb yozadi “RBK”. 180 metr balandlikka ega 39 qavatli minora Szyanbey tumanida joylashgan.
Aedas me’morchilik studiyasi aniqlik kiritishicha, binoning har bitta qavati 8,8 darajagacha “qayrilish burchagi”ga ega bo‘lib, bu boshqa har qanday qayrilma osmono‘par binonikidan kattaroq ko‘rsatkichdir.
Binoning 34 ta qavatida ofislar joylashgan, yana beshta qavat esa konferens-zallar va tadbirlar zallari uchun ajratilgan.
“Dance of Light konsepsiyasi tabiatdagi shimol yog‘dusi hodisasidan ilhomlangan. Binoning har bitta burchagidagi ikkita qarama-qarshi burilishlarning integratsiyasi tufayli fasad shahar kontekstida muntazam o‘zgarib turadi”, — dedi Aedas bosh dizayneri Ken Vay.
Dance of Light — dunyodagi birinchi spiralsimon osmono‘par bino emas. Shunday shaklga ega eng baland bino Dubayda joylashgan Infinity Tower bo‘lib hisoblanadi. 76 qavatli binoning balandligi 306 metr bo‘lib, har bitta qavat 1,2 darajaga siljigan.
Eng birinchi spiralsimon osmono‘par binolardan biri — Turning Torso Shvetsiyaning Malmyo shahrida joylashgan. 54 qavatli 190 metrli bino ispaniyalik me’mor Santyago Kalatrava tomonidan ishlab chiqilgan va 2005-yilda qurib bitkazilgan.
“Moskva-Siti” ishbilarmonlik markazi tarkibiga kiruvchi 55 qavatli “Evolyutsiya” minorasi ham qayrilma shaklga ega bo‘lib, 246 metrli binoning har bitta qavati o‘zidan avvalgi qavatga nisbatan 3 darajaga qayrilgan.
Izoh (0)