Atom energiyasi bo‘yicha xalqaro agentlik (MAGATE) bosh direktori Rafael Grossi agentlik delegatsiyasi shu hafta Zaporojye AESga borishini ma’lum qilgandi. “RIA Novosti”ning yozishicha, MAGATE inspektorlari Energodar shahridagi Zaporojye AESga yetib bordi.
Xabarga ko‘ra, Toshkent vaqti bilan taxminan 16:15 da stansiyaga to‘qqizta mashinadan iborat kortej kirib kelgan. Energodarga yetib kelishidan bir soat oldin snaryadlar va portlashlar ovozi eshitilgan.
Tashrif davomida MAGATE inspektorlari stansiyadagi vayronagarchilikni baholash, xavfsizlik tizimlarining ishlashini aniqlash, shuningdek, xodimlarning ish sharoitlarini baholashni rejalashtirmoqda.
Ta’kidlanishicha, MAGATE missiyasi mutaxassislarini hududda qoldiradi. “Tashkilot vakillari Energodar aholisi bilan suhbatlashishni ham rejalashtirmoqda”, — dedi bosh kotib Grossi.
Zaporojye AES — Yevropadagi eng yirik atom elektr stansiyasi. Rossiya qo‘shinlari uni urushning eng boshidayoq egallab olgandi. Ukraina va Rossiya bir-birini stansiyani o‘qqa tutishda ayblab kelmoqda.
MAGATE avgust boshida Zaporojye AES hududida xavfsizlik protokollari yoppasiga buzilayotganini ma’lum qilgandi. Urushni tadqiq qilish instituti Rossiya qo‘shinlari harbiy texnikani Ukraina hujumlaridan himoya qilish uchun, uni stansiya hududida saqlayotgani haqida yozgandi (stansiyada ushbu bayonotni isbotlovchi videoni tasvirga olishgan).
Mavzuga doir:
Izoh (0)