Даврани қиздирган «Божалар», рақсга тушаётган ҳокимлар: Андижонда ўтказилган байрам тадбиридан репортаж

Андижон шаҳридаги Алишер Навоий номидаги маданият ва истироҳат боғининг ёзги амфитеатрида Ўзбекистон мустақиллигининг 31 йиллигига бағишланган тантанали байрам тадбири бўлиб ўтди. Бу ҳақда «Дарё» мухбири Умиджон Мамарасулов хабар бермоқда.

«Янги Ўзбекистонда эл азиз, инсон азиз!» шиори остида ўтказилган бадиий-мусиқий, театрлаштирилган байрам тадбирида вилоятнинг барча туман ва шаҳарларидан таклиф этилган давлат, жамоат ташкилотлари, таълим муассасалари вакиллари, меҳнат фахрийлари, фаол ёшлар иштирок этди.

Тадбир аввалида Андижон вилояти ҳокими Шуҳрат Абдураҳмонов сўзга чиқиб, тантана қатнашчиларини ва уларнинг тимсолида барча андижонликларни мустақилликнинг ўттиз бир йиллиги билан қутлади.

Ҳокимнинг қайд этишича, жорий йилда вилоятда умумий қиймати 890 миллиард сўм бўлган 167 та инвестиция лойиҳаси амалга оширилиб, қарийб 9 минг та янги иш ўрни яратилган. Байрам арафасида шундай объектларнинг 120 таси фойдаланишга топширилган.

Таъкидланишича, жорий йилда таълим муассасаларининг инфратузилмасини яхшилаш учун қарийб 300 миллиард сўмга яқин маблағлар ҳисобига 18 та давлат мактабгача таълим ташкилотлари, 26 та мактабда қурилиш-таъмирлаш ишлари бажарилган.

Шунингдек, боғча ёшидаги болалар қамровини ошириш мақсадида йил бошидан буён 112 та нодавлат боғчалар ташкил этилган.

Байрам табригидан сўнг Ўзбекистон мустақиллигининг ўттиз бир йиллиги муносабати билан фахрий унвон, орден ва медаллар билан тақдирланган андижонликларга юксак давлат мукофотлари топширилган.

Шунингдек, 48 нафар ташаббускор фуқаро ва жамоатчилик тузилмалари вакиллари «Маҳалла ифтихори» кўкрак нишони билан тақдирланганларга кўкрак-нишонлари ҳамда бир йўла тўланадиган пул мукофоти ҳамда санаторийларда даволаниш учун бир марталик бепул йўлланмалар берилган.

Байрам дастурида миллатлараро дўстлик, Янги Андижон шаҳарчасидаги бунёдкорлик ишлари асосий мавзуга айланди. Қорақалпоқ, рус, уйғур ва қирғиз тилларида тароналар янграб, қардош халқларнинг рақслари ижро этилди.

Кечанинг бадиий қисмида андижонлик санъаткорлар «Ниҳол» давлат мукофоти совриндорлари Шоҳида Нурматова, Аброр Азизов, Аъзамжон Султонов, эстрада юлдузлари Жасур Мавлонов, Имрон, Ўзбекистонда хизмат кўрсатган артистлар Феруза Жуманиёзова ва Зиёда Қобилова ҳамда «Божалар» гуруҳи солисти Жаҳонгир Позилжоновнинг қўшиқлари барчани даврага чорлади.

Тантанали маросим 10 дақиқа давом этган байрам мушакбозлиги билан якунланди.