Аргентина вице-президенти Кристина Фернандес де Киршнерга ўз уйи ёнида тарафдорлари билан саломлашаётган пайтида суиқасд уюштирилди, деб ёзади Meduza.
Ҳодиса акс этган видеоларда бир одам унинг юзига тўппонча қаратиб тепкини босганини, аммо у отилмай қолганини кўриш мумкин.
Ҳужум қилган шахс қўлга олинди. У Бразилия фуқароси Фернанду Андре Сабаг Монтиел бўлиб чиқди, у илгари қонун билан боғлиқ муаммоларга учрамаган. У Аргентинанинг Берса русумли тўппончасидан фойдаланган.
Унинг қандай мақсадни кўзлагани ҳозирча номаълум.
Аргентина президенти Альберто Фернандес маълум қилишича, қурол бешта ўқ билан тўлдирилган, аммо отилмай қолган. Фернандес суиқасдни Аргентинада 1983 йилда «демократия тикланганидан буён юз берган энг жиддий ҳодиса» деб атади.
69 ёшли Кристина Фернандес де Киршнер 2007—2015 йилларда Аргентина президенти бўлган. У коррупция ҳақидаги иш бўйича айбланувчи сифатида қатнашмоқда, ўтган ҳафта прокурор уни 12 йилга озодликдан маҳрум қилиш ва давлат лавозимларини эгаллашни умрбод тақиқлашни сўраганидан кейин, унинг тарафдорлари уйининг ёнида навбатчилик қилмоқда. Сиёсатчи ҳар куни уйидан чиқишда ва уйига қайтишда тарафдорлари билан саломлашарди ва дастхат ёзиб берарди. Унинг уйи ёнида кўплаб полициячилар бўлган, аммо Киршнернинг тарафдорлари билан тўқнашувлардан кейин уларнинг сони қисқартирилганди.
Изоҳ (0)