“Ertasini o‘ylagan, taraqqiyotni ko‘zlagan davlat ta’limga e’tibor qaratadi” — jurnalist

O‘zbekiston mustaqilligining 31 yilligi munosabati bilan tashkil etilgan tantanali tadbirda prezident Shavkat Mirziyoyev O‘zbekistonda yillar davomida to‘plangan muammolar haqida so‘z ochib, ular ta’lim, sud, biznes, tibbiyot va suv masalasidagi muammolar ekanini ta’kidladi. Va 2026-yilga qadar mazkur masalalar yechimi bilan shug‘ullanib, muammolarni bartaraf etish haqida mas’ullarga topshiriq berdi.

Xo‘sh, davlat rahbari muammolar haqida gapirib, nega aynan ta’limni birinchi o‘rinda tilga oldi? “Daryo” muxbiri bilan suhbatlashgan jurnalist G‘olib Hasanov shu haqda fikr bildirdi.

Ertangi kunini o‘ylagan, taraqqiyotni ko‘zlagan va yoshlarning kelajagiga befarq bo‘lmagan har qanday davlat ta’limga e’tibor qaratadi. Xuddi shunday ota-onalar ham farzandining jamiyatda o‘z o‘rniga ega bo‘lishi, hayotda qoqilmasligi uchun yaxshi ta’lim-tarbiya olishiga e’tibor qaratishi kerak. Nima deb o‘ylaysiz, davlat rahbari nega aynan ta’limni eng birinchi bo‘lib tilga oldi? Fikri ojizimcha shuning uchunki, mamlakat siyosati, tanlagan yo‘liga mos ta’limni rivojlantirishga qaratilgan dastur bo‘lishi lozim.

Qaysidir davlatning ta’lim standartini ko‘r-ko‘rona ko‘chirish emas, bir necha davlatning bu boradagi tajribasini o‘rganib, xalqning turmush tarzi, an’ana va qadriyatlariga xos va albatta, xalqaro talablarga mos ta’lim standartini yaratish kerak, — deydi G‘olib Hasanov.

Ta’limning bugungi kundagi ahvoli qay darajaga tushib qoldi? Buning sabablari nimalardan iborat deb o‘ylaysiz? Ta’lim tizimidagi o‘zgarishlarni kuzatsam, haligacha aniq bir yo‘l, maqsad yo‘qdek taassurot uyg‘otyapti. Juda ko‘p o‘zgarishlarni boshladik, birinchisini yakuniga yetkazmasdan ikkinchisiga qo‘l uryapmiz. Yoki bir tartib to‘la amalga oshirilmasdan turib, bekor qilinib, yangisi boshlanyapti. Bu soha vakillarini qiyin vaziyatga solib qo‘ymoqda. Rahbarlar qo‘nimsizligi ham ta’lim sifatiga ta’sir qilmoqda. Bir rahbar boshlagan ish, vazirlikdan boshlab maktabgacha, ikkinchi rahbar kelganidan so‘ng bekor qilinib, yangidan, yangi komanda bilan boshlanmoqda. Vaholanki, kim vazir, boshqarma boshlig‘i, direktor bo‘lishidan qat’i nazar, aniq bir maqsadni amalga oshirishga harakat qilish lozim.

Kadrlar sifati, yoshlarning bilim darajasi pastligi prezident aynan ta’limga e’tibor qaratishiga turtki bo‘ldi. Shuni taqozo qildi. Mamlakatni malakali mutaxassislarsiz rivojlantirish qiyin ekanini anglab yetdik. Garchi reja va maqsadlar har qancha yuqori, dasturlar zo‘r bo‘lmasin, uni hayotga tatbiq etadigan inson intellekti kuchli bo‘lishi kerak, — deydi jurnalist.

Ta’limni rivojlantirish uchun prezident nima qilmoqchi va Siz nima taklif berasiz deyishsa, prezidentimiz ta’kidlaganidek, ta’limni avvalo maktabdan, maktabgacha ta’limdan boshlab rivojlantirishimiz kerak deyman. Ta’limdagi mas’ullar prezident talabini anglab, vazifasiga vijdonan yondashishi, ta’limga e’tiborning hayot-mamot masalasi ekaniga balandparvoz gap sifatida emas, o‘zining, yurtning kelajagi deb qarashi kerak. Birinchi navbatda maqsadni aniq qilib, unga erishish uchun rejalarni belgilash, tizimda qat’iy tartib-intizom o‘rnatish, korrupsiya, tanish-bilishchilik, qarindosh-urug‘chilikka qarshi keskin kurashish lozim. O‘qituvchining jamiyatdagi maqomini oshirish, uning hurmat-e’tiborini joyiga qo‘yish zarur. Shaxsan men bugungi jamiyatning ongli va faol a’zosi sifatida prezident jamoasiga bu borada ishonishimni, ularni qo‘llab-quvvatlash uchun qo‘limdan kelganini qilishga tayyorligimni aytib o‘tmoqchiman”, — deydi jurnalist G‘olib Hasanov.