SHHT sammiti sabab Samarqand shahridagi bir qator ko‘chalarda transport vositalari harakati cheklanadi

Samarqand shahrida Shanxay hamkorlik tashkiloti davlatlarining navbatdagi sammiti o‘tkazilishi munosabati bilan shahardagi bir qator ko‘chalarda avtomobil harakati cheklanadi. Bu haqdagi qaror Xalq deputatlari Samarqand shahar kengashining navbatdan tashqari 69-sessiyasida qabul qilingan, deya xabar berdi “Daryo” muxbiri.

Qarorga muvofiq 14-sentabrdan 17-sentabrga qadar Samarqand shahridagi Ibn Sino, Bo‘stonsaroy, Universitet xiyoboni, Namozgoh, Sadriddin Ayniy, Registon, Rudakiy, Shohizinda, Usto Umar Jo‘raqulov, Islom Karimov, Afrosiyob, Beruniy, Mirzo Ulug‘bek, Gulobod, Muqimiy va Dahbed ko‘chalarida barcha transport vositalarining harakati cheklanadi.

Harakat qatnovi cheklangan ko‘chalarda tez tibbiy yordam va Favqulodda vaziyatlar vazirligining maxsus transport vositalariga istisno tariqasida harakatlanish uchun ruxsat beriladi. Haydovchilarga noqulayliklar tug‘dirmaslik maqsadida aylanma yo‘llar orqali harakatlanish tashkil etiladi.

Xalqaro ahamyatga ega M-37, M-37A hamda M-39 avtomobil yo‘llarining shahar hududiga kirish-chiqish qatnov qismlarida transport vositalarining harakati cheklanadi.

5-sentabrdan 20-sentabrgacha shahar hududiga yuk avtotransport vositalari va maxsus texnika vositalari qatnovi ham vaqtincha cheklanadi.

M-37A Samarqand halqa yo‘li avtomobil yo‘lining 40–43-kilometrlari oralig‘ida joylashgan “Samarqand Siyob savdo” unitar korxonasiga (avtomobillar ehtiyot qismlari bozori) keladigan fuqarolar uchun mavjud avturargoh yo‘lning qarama-qarshi qismida joylashganligi sababli unitar korxona 5-sentabrdan 20-sentabrgacha vaqtincha faoliyat yuritmaydi.

Mazkur nufuzli tadbir davrida Samarqand shahridagi jamoat joylarida fuqarolar yig‘ilib qolishi hamda shahar ichida transport qatnovini kamaytirish maqsadida shahardagi barcha umumta’lim maktablari yangi o‘quv yilini 19-sentabr kunidan boshlaydi.

Shuningdek, oliy va o‘rta-maxsus ta’lim muassasalarida 26-sentabr kunidan dars jarayonlari boshlanadi. Qoldirilgan dars mashg‘ulotlari soatlarini o‘quv yili davomida beriladigan ta’tillar hisobidan qoplanishi belgilandi.