Toshkent shahrining Yangihayot tumani “Yangi Choshtepa” mahallasi 1-sentabr kuni elektrsiz qolgani haqida “Muxbir Daliyev” Telegram-kanalida xabar berilgan edi. Energetika vazirligi matbuot kotibi holat yuzasidan munosabat bildirdi.
Qayd etilishicha, haqiqatan ham soat 16:24 da Yangihayot tumanidagi yuqori kuchlanishli “Ruboiy” podstansiyasidagi iste’molchi tasarrufida bo‘lgan 10 kV tarmoqda nosozlik yuzaga kelgan. Ushbu nosozlik elektr ta’minoti korxonasi tomonidan soat 17:45 da (1,5 soatda) bartaraf etilgan va iste’molchilarning elektr ta’minoti to‘liq qayta tiklangan.
Eslatib o‘tamiz, iste’molchilarning elektr ta’minoti barqarorligini ta’minlash maqsadida respublika bo‘ylab tun-u kun ishlaydigan navbatchilik brigadalari tashkil etilgan va barcha zaruriy texnikalar va materiallar bilan ta’minlangan. Hurmatli iste’molchilar, elektr energiyasi ta’minoti yuzasidan 1154 qisqa raqami yoki Telegram’dagi (@HET_admin) administratorga murojaat qilishingiz mumkin, — deyiladi xabarda.Avvalroq Energetika vazirligi mamlakat mustaqilligining 31 yillik bayramini yuqori darajada o‘tkazish maqsadida tizim tashkilotlari tomonidan iste’molchilarni energiya resurslari bilan barqaror ta’minlash choralari ko‘rilganini e’lon qilgandi.
Izoh (0)