Ўзбекистон мустақиллигининг 31 йиллиги муносабати билан ташкил этилган тантанали тадбирда президент Шавкат Мирзиёев Ўзбекистонда йиллар давомида тўпланган муаммолар ҳақида сўз очиб, улар таълим, суд, бизнес, тиббиёт ва сув масаласидаги муаммолар эканини таъкидлади. Ва 2026 йилга қадар мазкур масалалар ечими билан шуғулланиб, муаммоларни бартараф этиш ҳақида масъулларга топшириқ берди.
Хўш, давлат раҳбари муаммолар ҳақида гапириб, нега айнан таълимни биринчи ўринда тилга олди? «Дарё» мухбири билан суҳбатлашган журналист Ғолиб Ҳасанов шу ҳақда фикр билдирди.
Эртанги кунини ўйлаган, тараққиётни кўзлаган ва ёшларнинг келажагига бефарқ бўлмаган ҳар қандай давлат таълимга эътибор қаратади. Худди шундай ота-оналар ҳам фарзандининг жамиятда ўз ўрнига эга бўлиши, ҳаётда қоқилмаслиги учун яхши таълим-тарбия олишига эътибор қаратиши керак. Нима деб ўйлайсиз, давлат раҳбари нега айнан таълимни энг биринчи бўлиб тилга олди? Фикри ожизимча шунинг учунки, мамлакат сиёсати, танлаган йўлига мос таълимни ривожлантиришга қаратилган дастур бўлиши лозим.Журналист таълимнинг бугунги кундаги аҳволи ачинарли экани ҳақида сўз юритиб, бунинг сабаблари ҳақида ҳам гапирди.Қайсидир давлатнинг таълим стандартини кўр-кўрона кўчириш эмас, бир неча давлатнинг бу борадаги тажрибасини ўрганиб, халқнинг турмуш тарзи, анъана ва қадриятларига хос ва албатта, халқаро талабларга мос таълим стандартини яратиш керак, — дейди Ғолиб Ҳасанов.
Таълимнинг бугунги кундаги аҳволи қай даражага тушиб қолди? Бунинг сабаблари нималардан иборат деб ўйлайсиз? Таълим тизимидаги ўзгаришларни кузацам, ҳалигача аниқ бир йўл, мақсад йўқдек таассурот уйғотяпти. Жуда кўп ўзгаришларни бошладик, биринчисини якунига етказмасдан иккинчисига қўл уряпмиз. Ёки бир тартиб тўла амалга оширилмасдан туриб, бекор қилиниб, янгиси бошланяпти. Бу соҳа вакилларини қийин вазиятга солиб қўймоқда. Раҳбарлар қўнимсизлиги ҳам таълим сифатига таъсир қилмоқда. Бир раҳбар бошлаган иш, вазирликдан бошлаб мактабгача, иккинчи раҳбар келганидан сўнг бекор қилиниб, янгидан, янги команда билан бошланмоқда. Ваҳоланки, ким вазир, бошқарма бошлиғи, директор бўлишидан қатъи назар, аниқ бир мақсадни амалга оширишга ҳаракат қилиш лозим.Ғолиб Ҳасанов таълимни ривожлантириш учун қандай таклиф бериши ҳақида ҳам сўз юритди.Кадрлар сифати, ёшларнинг билим даражаси пастлиги президент айнан таълимга эътибор қаратишига туртки бўлди. Шуни тақозо қилди. Мамлакатни малакали мутахассисларсиз ривожлантириш қийин эканини англаб етдик. Гарчи режа ва мақсадлар ҳар қанча юқори, дастурлар зўр бўлмасин, уни ҳаётга татбиқ этадиган инсон интеллекти кучли бўлиши керак, — дейди журналист.
Таълимни ривожлантириш учун президент нима қилмоқчи ва Сиз нима таклиф берасиз дейишса, президентимиз таъкидлаганидек, таълимни аввало мактабдан, мактабгача таълимдан бошлаб ривожлантиришимиз керак дейман. Таълимдаги масъуллар президент талабини англаб, вазифасига виждонан ёндашиши, таълимга эътиборнинг ҳаёт-мамот масаласи эканига баландпарвоз гап сифатида эмас, ўзининг, юртнинг келажаги деб қараши керак. Биринчи навбатда мақсадни аниқ қилиб, унга эришиш учун режаларни белгилаш, тизимда қатъий тартиб-интизом ўрнатиш, коррупция, таниш-билишчилик, қариндош-уруғчиликка қарши кескин курашиш лозим. Ўқитувчининг жамиятдаги мақомини ошириш, унинг ҳурмат-эътиборини жойига қўйиш зарур. Шахсан мен бугунги жамиятнинг онгли ва фаол аъзоси сифатида президент жамоасига бу борада ишонишимни, уларни қўллаб-қувватлаш учун қўлимдан келганини қилишга тайёрлигимни айтиб ўтмоқчиман», — дейди журналист Ғолиб Ҳасанов.
Изоҳ (0)