Andijonda bir vaqtning o‘zida 100 nafar tug‘ruq yoshidagi ayol uchun xizmat ko‘rsatadigan viloyat perinatal markazining qo‘shimcha binosi foydalanishga topshirildi. Bu haqda “Daryo” muxbiri xabar bermoqda.
Ta’kidlanishicha, tantanali marosimda so‘zga chiqqan Andijon viloyati hokimi Shuhrat Abdurahmonov so‘nggi yillarda tibbiyot maskanlarining moddiy-texnik bazasi mustahkamlanib, tibbiy xizmat ko‘rsatish sifati yaxshilanayotganini, shuningdek, ona va bola salomatligini ta’minlash masalasi davlat ijtimoiy siyosatining ustuvor yo‘nalishlaridan biri ekanini qayd etgan.
Tadbirda aytilishicha, prezidentning 2022-yil 25-apreldagi “2022—2026-yillarda onalik va bolalikni muhofaza qilishni kuchaytirish to‘g‘risida”gi qarori asosida 2022—2025-yillar davomida respublika bo‘yicha 227 ta tug‘uruq kompleksi va 46 ta tumanlararo perinatal markazlarining to‘liq qurilishi va ta’mirlanishi rejalashtirilgan bo‘lib, buning uchun xalqaro moliya institutlarining 105 million dollarlik grant va kredit mablag‘lari jalb qilinishi belgilangan.
Ushbu qaror ijrosini ta’minlash maqsadida markaz uchun davlat investitsiya dasturi asosida 100 o‘ringa mo‘ljallangan yangi bino qurilib, foydalanishga topshirilgan. Buning uchun jami 21,5 milliard so‘mdan ziyod mablag‘ sarflangan. Binoga qabulxona, 60 o‘rinli homiladorlar xastaligi, 30 o‘rinli kasallikka moyil bo‘lgan chaqaloqlar hamda 12 o‘rinli chaqaloqlar reanimatsiyasi bo‘limlari joylashtirilgan. Shuningdek Andijon davlat tibbiyot instituti talabalarining amaliyot o‘tashlari uchun alohida xonalar ajratilgan.Markazda 250 nafardan ziyod tibbiyot xodimlari ishlaydi. Ular markazga tashrif buyurgan homilador ayollar va tug‘ilgan chaqaloqlarga sifatli doyalik yordamini ko‘rsatadi. Shu bilan birga yangi tug‘ilgan chaqaloqda kasalliklar aniqlansa, shu joyning o‘zida ularni davolash davom ettiriladi. Avvallari chaqaloqlarda kasallik aniqlansa, boshqa bolalar shifoxonasiga yuborish majbur bo‘linar edi”, — deydi Mufazzalshoh Muhammadiyev.
Qayd etilishicha, kelgusida viloyatning Shahrixon, Paxtaobod, Qo‘rg‘ontepa hamda Baliqchi tumanlarida tumanlararo perinatal markazlarni tashkil etish rejalashtirilgan.
Izoh (0)