Mobiuz Toshkentda 5Gni ishga tushirmoqda

O‘zbekiston mustaqilligining 31 yilligi arafasida Mobiuz yuqori tezlikdagi beshinchi avlod internetini taqdim etmoqda.

Mobiuz mobil operatori o‘z abonentlari va aholini texnologik yutuqlar bilan xursand qilishda davom etadi. Zero, kompaniyaning maqsadi – ilg‘or yechimlarni joriy etishda birinchilar qatorida bo‘lishdir.

Mobiuz’ning tijoriy 5G tarmog‘i bir vaqtning o‘zida Toshkent shahrining beshta tumanidagi sakkizta joyda ishga tushmoqda. Bu orqali Mobiuz mamlakatimiz poytaxtini beshinchi avlod tarmog‘i bilan hozirgi kunda eng keng qamrab olgan ilk operatorga aylanmoqda.

Xususan, 5G tamog‘idan poytaxtning quyidagi joylarida foydalanish mumkin:

• Mirobod tumani, Oybek metro bekati atrofida, shuningdek, “Poxtaxt” savdo markazi (Brodvey) hududida;
• Mirzo Ulug‘bek tumani, “Le Grand Plaza” mehmonxonasi (sobiq “Tata”) atrofida;
• Yunusobod tumani, Mobiuz Markaziy ofisi hududi, shuningdek, “Poxtaxt” biznes markazi atrofida;
• Shayxontohur tumani, “Fleshka” (Malika) savdo majmuasi hududida;
• Chilonzor tumani, “Chilonzor buyum bozori” hududi (Ippodrom) va Toshkent davlat iqtisodiyot universiteti atrofida (Tashkent City, Beshyog‘och).

“5Gdan foydalanish” xizmatini faollashtirish uchun abonentlar tarmoq qamrovi hududlarida *223*1# USSD buyrug‘ini terishlari kerak. Tarmoq faqat 5G texnologiyasini qo‘llab-quvvatlaydigan va qurilma dasturiy ta’minoti ishlab chiqaruvchisi tomonidan ruxsat berilgan qurilmalarda ishlaydi.

Beshinchi avlod tarmog‘ining imkoniyatlaridan ikki usulda foydalanish mumkin:

• 75 ming so‘mga 50 000 MBlik maxsus 5G to‘plamini ulash orqali (*225*50000#). Bunday holda mobil internet 1 Gbit/s tezlikkacha ishlaydi;
• maxsus to‘plam ulamasdan turib foydalanganda mobil internet 300 Mbit/s tezlikacha bo‘ladi.

5G tayanch stansiyalari Toshkent shahrida bir yil avval o‘rnatilgandi. Kompaniyaning yetti yilligi munosabati bilan o‘tgan yilning 1-dekabrida tarmoq sinov tariqasida ishga tushirilgan. Keyinchalik tijoriy foydalanishga topshirish uchun zaruriy tayyorgarlik ishlari amalga oshirildi. Hozirgi kunga kelib, tarmoqlarimizdan foydalanayotgan abonentlarning 5G qurilmalari soni yetarlicha darajaga keldi. 5Gni ishga tushirish – bu Mobiuz faoliyatidagi muhim qadamlardan biridir. U Xitoy Xalq Respublikasidagi hamkorlarimiz bilan investitsiya loyihasi doirasida amalga oshirilayotgan ishlarning yorqin namunasidir. Kelgusida beshinchi avlod tarmog‘imiz sezilarli darajada kengayib, yangi hududlarni qamrab oladi.

Reklama huquqi asosida.