Андижонда бир вақтнинг ўзида 100 нафар туғруқ ёшидаги аёл учун хизмат кўрсатадиган вилоят перинатал марказининг қўшимча биноси фойдаланишга топширилди. Бу ҳақда «Дарё» мухбири хабар бермоқда.
Таъкидланишича, тантанали маросимда сўзга чиққан Андижон вилояти ҳокими Шуҳрат Абдураҳмонов сўнгги йилларда тиббиёт масканларининг моддий-техник базаси мустаҳкамланиб, тиббий хизмат кўрсатиш сифати яхшиланаётганини, шунингдек, она ва бола саломатлигини таъминлаш масаласи давлат ижтимоий сиёсатининг устувор йўналишларидан бири эканини қайд этган.
Тадбирда айтилишича, президентнинг 2022 йил 25 апрелдаги «2022—2026 йилларда оналик ва болаликни муҳофаза қилишни кучайтириш тўғрисида»ги қарори асосида 2022—2025 йиллар давомида республика бўйича 227 та туғуруқ комплекси ва 46 та туманлараро перинатал марказларининг тўлиқ қурилиши ва таъмирланиши режалаштирилган бўлиб, бунинг учун халқаро молия институтларининг 105 миллион долларлик грант ва кредит маблағлари жалб қилиниши белгиланган.
Ушбу қарор ижросини таъминлаш мақсадида марказ учун давлат инвестиция дастури асосида 100 ўринга мўлжалланган янги бино қурилиб, фойдаланишга топширилган. Бунинг учун жами 21,5 миллиард сўмдан зиёд маблағ сарфланган. Бинога қабулхона, 60 ўринли ҳомиладорлар хасталиги, 30 ўринли касалликка мойил бўлган чақалоқлар ҳамда 12 ўринли чақалоқлар реанимацияси бўлимлари жойлаштирилган. Шунингдек Андижон давлат тиббиёт институти талабаларининг амалиёт ўташлари учун алоҳида хоналар ажратилган.Марказда 250 нафардан зиёд тиббиёт ходимлари ишлайди. Улар марказга ташриф буюрган ҳомиладор аёллар ва туғилган чақалоқларга сифатли доялик ёрдамини кўрсатади. Шу билан бирга янги туғилган чақалоқда касалликлар аниқланса, шу жойнинг ўзида уларни даволаш давом эттирилади. Авваллари чақалоқларда касаллик аниқланса, бошқа болалар шифохонасига юбориш мажбур бўлинар эди», — дейди Муфаззалшоҳ Муҳаммадиев.
Қайд этилишича, келгусида вилоятнинг Шаҳрихон, Пахтаобод, Қўрғонтепа ҳамда Балиқчи туманларида туманлараро перинатал марказларни ташкил этиш режалаштирилган.
Изоҳ (0)