Moldova Sog‘liqni saqlash vazirligi Zaporojye atom elektr stansiyasida “yadroviy falokat” yuz bergan taqdirda qo‘llash uchun mamlakat hududlari bo‘ylab 1 million tabletka kaliy yodid tarqatishga qaror qildi. Bu haqda Kishinyov tibbiy-ijtimoiy yordam bosh boshqarmasi boshlig‘i Boris Gilke ma’lum qildi.
Gilkening so‘zlariga ko‘ra, radioaktiv moddalar tarqalishidan himoyalanish uchun qo‘llaniladigan tegishli dori faqat xavf tug‘ilgan paytda davlat fuqarolari o‘rtasida taqsimlanadi.
“Bu fuqarolar ushbu preparatlarga murojaat qilishi shart, degani emas. Faqat xavf tug‘ilganda va favqulodda sog‘liqni saqlash komissiyasining qarori bilan tabletkalar fuqarolar o‘rtasida taqsimlanadi”, — deya tushuntirdi Gilke.
Kishinyov hokimiyati vakilining bayonoti Zaporojye AES hududining davomiy o‘qqa tutilishi fonida tarqaldi. Bir qator ommaviy axborot vositalari bunday holat o‘tgan asrning 80-yillarida Chernobil AESdagi avariyaga o‘xshash “yadroviy falokat”ga olib kelishi mumkinligini bir necha bor ta’kidlagan. Ehtimoliy falokat oqibatlari esa chegarasi ZAESdan atigi 400 kilometr uzoqlikda joylashgan Moldovaga ta’sir qilishi mumkin.
Izoh (0)