Молдова Соғлиқни сақлаш вазирлиги Запорожье атом электр станциясида «ядровий фалокат» юз берган тақдирда қўллаш учун мамлакат ҳудудлари бўйлаб 1 миллион таблетка калий ёдид тарқатишга қарор қилди. Бу ҳақда Кишинёв тиббий-ижтимоий ёрдам бош бошқармаси бошлиғи Борис Гилке маълум қилди.
Гилкенинг сўзларига кўра, радиоактив моддалар тарқалишидан ҳимояланиш учун қўлланиладиган тегишли дори фақат хавф туғилган пайтда давлат фуқаролари ўртасида тақсимланади.
«Бу фуқаролар ушбу препаратларга мурожаат қилиши шарт, дегани эмас. Фақат хавф туғилганда ва фавқулодда соғлиқни сақлаш комиссиясининг қарори билан таблеткалар фуқаролар ўртасида тақсимланади», — дея тушунтирди Гилке.
Кишинёв ҳокимияти вакилининг баёноти Запорожье АЭС ҳудудининг давомий ўққа тутилиши фонида тарқалди. Бир қатор оммавий ахборот воситалари бундай ҳолат ўтган асрнинг 80 йилларида Чернобил АЭСдаги аварияга ўхшаш «ядровий фалокат»га олиб келиши мумкинлигини бир неча бор таъкидлаган. Эҳтимолий фалокат оқибатлари эса чегараси ЗАЭСдан атиги 400 километр узоқликда жойлашган Молдовага таъсир қилиши мумкин.
Изоҳ (0)