Litva Belarus bilan chegaradagi devor qurilishini yakunladi, deb yozadi “RBK” loyiha ijrochisi EPSO-G kompaniyasiga tayanib.
“O‘tgan dam olish kunlari EPSO-G tomonidan tuzilgan pudratchilar jamoasi Belarus bilan chegarada to‘siqning so‘nggi qismlarini o‘rnatdi”, — dedi kompaniya vakili Antanas Bubnyalis.
To‘siq va tikanli sim jami qariyb 502 kilometr uzunlikdagi hududga o‘rnatilgan.
Ayni paytda texnik xizmat ko‘rsatish mutaxassislari devordagi mayda nuqsonlarni bartaraf etmoqda. SHuningdek, yo‘llar va qurilish maydonlari qayta tiklanmoqda, loyiha hujjatlari tegishli holatga keltirilmoqda.
Litva bosh vaziri Ingrida Shimonite maxsus komissiya qurilish yakunlanganini tasdiqlaganini, faqat tashkiliy hujjatlar bilan bog‘liq ishlar qolganini aytdi. Devor Belarus bilan chegarani deyarli to‘liq yopsa-da (chegaraning jami uzunligi 679 km, shuning 100 kilometrdan ziyodi daryo va ko‘llar qirg‘oqlaridan o‘tadi), Shimonite to‘siq davlatni noqonuniy migratsiyadan yuz foiz himoya qilmasligini tan oldi.
Shimonite chegarada devor qilish niyatini o‘tgan yil yozida e’lon qilgan, bunga Yaqin Sharqdan kelgan muhojirlar Belarus tomondan yopirilib kelishi sabab bo‘lgan edi. Undan avvalroq Belarus prezidenti Aleksandr Lukashenko Ryanair samolyoti Minskka majburiy qo‘ndirilgani uchun kiritilgan Yevropa sanksiyalariga javoban, uning mamlakati Yevroittifoqqa noqonuniy muhojirlikka qarshi kurashda boshqa yordam bermasligini aytgandi. Shundan keyin Belarus hududi orqali Yevroittifoqqa o‘tmoqchi bo‘lgan Yaqin Sharq mamlakatlari fuqarolari soni keskin oshib ketdi. Belarus va Yevroittifoq chegarasidagi vaziyat noyabrda keskinlashdi. Bir necha kunlik to‘qnashuvlar hamda Lukashenko va Angela Merkel o‘rtasidagi muzokaralardan keyin muhojirlar chegaradagi lagerlarni tark etdi.
Latviya va Polsha ham Belarusdan o‘zini to‘siq bilan ajratishga qaror qildi. Varshava iyun oxirida balandligi 5 metr va uzunligi 186 km (bu Polsha—Belarus chegarasi uzunligining qariyb yarmiga teng) bo‘lgan devor qurilishini yakunlaganini ma’lum qilgandi.
Mavzuga doir:
Izoh (0)