Ashxobodda ishsizlikning yuqori darajasi tufayli baklajka yig‘ish va ularni haq evaziga qayta ishlash markazlariga topshirish kambag‘al aholi uchun pul topish usullaridan biri edi, deb yozadi “Xronika Turkmenistana”.
Nashrning ta’kidlashicha, shahar ko‘chalarida, bog‘lar, avtobus bekatlari va chiqindi qutilarida shisha yig‘ayotgan katta sumkali odamlarni tez-tez uchratish mumkin. Qabul punktida qayta ishlanadigan mahsulotning kilogrammi uchun 2 manatdan (6 ming so‘mdan ko‘proq) to‘lanadi.
Biroq “Xronika Turkmaniston” muxbirlariga ko‘ra, endi shahar ma’muriyati xususiy shaxslarga shisha yig‘ishni taqiqlashga qaror qilgan, chunki bu yo‘l bilan odamlar “mamlakatni sharmanda qilmoqda”.
Shahar hokimligi buyrug‘i bilan yig‘ish punktlarida navbatchilik qilayotgan militsiya xodimlari baklajka yig‘uvchilarni ushlamoqda. Qoidaga ko‘ra, ushlanganlar baklajka yig‘ish endi taqiqlangani haqida ogohlantiriladi. Guvohlarning so‘zlariga ko‘ra, huquq-tartibot idoralarining ayrim xodimlari odamlarga 50 manat (taxminan 157 ming so‘m) jarima solgan holatlar ham bo‘lgan.
Politsiyaning tushuntirishicha, endi faqat uy-joy kommunal xo‘jaligida ro‘yxatdan o‘tgan ko‘cha tozalovchilar qayta ishlanadigan buyumlarni yig‘ish va topshirish huquqiga ega.
Bunga qadar ishsiz va baklajka terib yurganlarni istalgan vaqtda ko‘chada topish mumkin edi. “Xronika Turkmenistana” jurnalisti bilan suhbatda odamlar bu taqiq vaqtinchalik ekaniga umid qilishini, chunki ularning ishi hech kimga xalaqit qilmasligi, bu ularga pul ishlash imkoniyatini berishi va shaharning tozaligiga hissa qo‘shishini aytgan.
Izoh (0)