Эрон ҳукумати Ироқ билан чегарадаги назорат-ўтказиш пунктлари ишини тўхтатди. Бу ҳақда Эрон ички ишлар вазир ўринбосари Мажид Мираҳмадига таяниб, «Коммерсантъ» хабар бермоқда.
Бу қарор Бағдодда бошланган тартибсизликлар фонида қабул қилинган. Эрон ҳукумати ҳам фуқароларини эвакуация қилиш учун Ироққа фавқулодда парвоз уюштирмоқда.
Эрон элчихонаси ўз фуқароларидан Бағдодга, шунингдек, Қозимия ва Самарра шаҳарларига саёҳат қилишдан тийилишни сўраган.
Шунингдек, Эроннинг Имом Хомайний халқаро аэропорти баъзи авиакомпаниялари ҳам Ироқ пойтахтига парвозларни бекор қилганини маълум қилди.
Кеча, 29 август куни шиа имоми Муқтада ас-Садр тарафдорлари Бағдоддаги Ироқ ҳукумати қароргоҳига бостириб киришга ҳаракат қилди. Шу куни Ироқ хавфсизлик кучлари парламент биноси устидан назоратни тиклаб олишга муваффақ бўлди. Тўқнашувлар пайтида 30 дан ортиқ одам ҳалок бўлган, 700 га яқин киши жароҳат олган.
Шу муносабат билан Бирлашган Миллатлар Ташкилоти Бош котиби Антониу Гутерриш Ироқдаги можаро томонларини кескинликни камайтиришга чақирди.
Изоҳ (0)