Atom energiyasi bo‘yicha xalqaro agentlik (MAGATE) bosh direktori Rafael Grossi agentlik delegatsiyasi shu hafta Zaporojye AESga yetib borishini ma’lum qildi, deb yozadi Meduza.
“MAGATEning ko‘mak va hamkorlik bo‘yicha missiyasi Zaporojye AESga qarab yo‘l oldi. Biz Ukraina va Yevropaning eng yirik yadro obyekti xavfsizligi va bus-butunligini ta’minlashimiz kerak. Shu hafta keyinroq ZAESda bo‘ladigan ushbu missiyaga rahbarlik qilayotganimdan faxrlanaman”, — dedi Grossi.
MAGATE saytida xabar berilishicha, agentlik missiyasi ZAES obyektlariga yetkazilgan jismoniy zararni baholashi, xavfsizlik va qo‘riqlov bo‘yicha asosiy va zaxira tizimlar ishlash-ishlamasligini aniqlashi, xodimlarning ishlash sharoitlariga baho berishi va AESda xavfsizlikni ta’minlash uchun shoshilinch choralar qabul qilishi kerak bo‘ladi.
Zaporojye AES — Yevropadagi eng yirik atom elektr stansiyasi. Rossiya qo‘shinlari uni urushning eng boshidayoq egallab olgandi. Ukraina va Rossiya bir-birini stansiyani o‘qqa tutishda ayblab kelmoqda.
MAGATE avgust boshida Zaporojye AES hududida xavfsizlik protokollari yoppasiga buzilayotganini ma’lum qilgandi. Urushni tadqiq qilish instituti Rossiya qo‘shinlari harbiy texnikani Ukraina hujumlaridan himoya qilish uchun, uni stansiya hududida saqlayotgani haqida yozgandi (stansiyada ushbu bayonotni isbotlovchi videoni tasvirga olishgan).
Izoh (0)