Атом энергияси бўйича халқаро агентлик (МАGATE) бош директори Рафаэл Гросси агентлик делегацияси шу ҳафта Запорожье АЭСга етиб боришини маълум қилди, деб ёзади Meduza.
«МАGATEнинг кўмак ва ҳамкорлик бўйича миссияси Запорожье АЭСга қараб йўл олди. Биз Украина ва Европанинг энг йирик ядро объекти хавфсизлиги ва бус-бутунлигини таъминлашимиз керак. Шу ҳафта кейинроқ ЗАЭСда бўладиган ушбу миссияга раҳбарлик қилаётганимдан фахрланаман», — деди Гросси.
МАGATE сайтида хабар берилишича, агентлик миссияси ЗАЭС объектларига етказилган жисмоний зарарни баҳолаши, хавфсизлик ва қўриқлов бўйича асосий ва захира тизимлар ишлаш-ишламаслигини аниқлаши, ходимларнинг ишлаш шароитларига баҳо бериши ва АЭСда хавфсизликни таъминлаш учун шошилинч чоралар қабул қилиши керак бўлади.
Запорожье АЭС — Европадаги энг йирик атом электр станцияси. Россия қўшинлари уни урушнинг энг бошидаёқ эгаллаб олганди. Украина ва Россия бир-бирини станцияни ўққа тутишда айблаб келмоқда.
МАGATE август бошида Запорожье АЭС ҳудудида хавфсизлик протоколлари ёппасига бузилаётганини маълум қилганди. Урушни тадқиқ қилиш институти Россия қўшинлари ҳарбий техникани Украина ҳужумларидан ҳимоя қилиш учун, уни станция ҳудудида сақлаётгани ҳақида ёзганди (станцияда ушбу баёнотни исботловчи видеони тасвирга олишган).
Изоҳ (0)