NATO bosh kotibi Yens Stoltenberg alyansning Arktikadagi ishtirokini kuchaytirish zarurligini ma’lum qildi. U buni Rossiyaning so‘nggi paytlarda ushbu mintaqada faollashgani bilan izohladi. Bundan tashqari, Xitoy Arktikaga qiziqish bildirmoqda, deydi alyans rahbari.
“Pekin va Moskva Arktikadagi amaliy faoliyatini oshirishga ham kelishib oldi. Bu chuqurlashib borayotgan strategik hamkorlikning bir qismi bo‘lib, u bizning qadriyatlarimiz va manfaatlarimizga qarshi chiqmoqda”, — dedi Yens Stoltenberg Welt am Sonntag nashriga bergan intervyusida.
NATO bosh kotibiga ko‘ra, Rossiya Arktikada sovet davridan qolgan bazalarni ochgan, u yerda gipertovushli raketalar singari yangi ilg‘or qurollarni joylashtirgan va sinovdan o‘tkazgan.
“NATO Arktikadagi ishtirokini kuchaytirishi kerak”, — dedi u. Stoltenberg, shuningdek, Shvetsiya va Finlyandiyaning alyansga qo‘shilishi fonida NATOning Arktika mudofaasiga qiziqishi ortib borayotganini qayd etdi.
2020-yil oktabr oyida Rossiya prezidenti Vladimir Putin Arktikani 2035-yilgacha rivojlantirish strategiyasini tasdiqlagan edi. Strategiyaga ko‘ra, Arktika zonasidagi rus qo‘shinlari zamonaviy qurollar bilan ta’minlanishi kerak.
2013-yilda esa Xitoy rahbari Si Szinpin “Bir kamar, bir yo‘l” tashabbusini ilgari surgan. Uning loyihalaridan biri — Xitoyni Arktika orqali Yevropaga olib chiqadigan “Muz Ipak yo‘li”. Ushbu loyiha doirasida Xitoy Rossiya bilan birgalikda Shimoliy dengiz yo‘lini ishlab chiqmoqda. 2035-yilgacha Rossiya hukumati uni rivojlantirish uchun 1,8 trillion rubl ajratadi.
Rossiya TIV Finlyandiya va Shvetsiyaning NATOga qo‘shilishi Arktikadagi vaziyatni murakkablashtirishi mumkinligini aytgan. 25-avgust kuni Yens Stoltenberg Xitoy va Rossiyaning Arktikadagi hamkorligi NATO manfaatlari va qadriyatlariga tahdid ekanligini bildirdi. 27-avgust kuni AQSH Arktika mintaqasida maxsus topshiriqlar bo‘yicha elchi lavozimini joriy etish niyatida ekani ma’lum bo‘ldi.
Izoh (0)