Pokiston Amerika uchuvchisiz uchar qurilmalariga Afg‘onistonga kirish va uning hududiga zarbalar berish uchun o‘zining havo hududidan foydalanishga ruxsat bergan. Bu haqda Afg‘onistonda hokimiyatni egallab olgan “Tolibon” tomonidan tayinlangan mudofaa vaziri mulla Muhammad Yoqub ma’lum qildi, deb yozadi “RBK”.
U bu haqda “Al-Qoida” yetakchisi Ayman az-Zavohiriy iyul oxirida o‘ldirilganidan keyin ma’lum qildi. O‘shanda AQSH az-Zavohiriy Kobulda ekanidan xabar topgan va uchuvchisiz uchar qurilma yordamida zarba bergan edi. Tinch aholi orasida qurbonlar bo‘lmadi, deya ishontirgandi AQSH. “Tolibon” hukumati Vashingtonning hujumini qoralagandi.
Yoqub ta’kidlashicha, Afg‘oniston havo hududida patrullik qilish uchun dronlardan foydalanilishi mamlakat chegaralarining ochiqdan-ochiq buzilishi hisoblanadi.
“Biz Pokistondan o‘z havo hududidan bizga qarshi foydalanmaslikni so‘raymiz”, — dedi u.
Pokiston AQSHning aksilterrorchilik operatsiyasiga aloqadorligini va undan xabardor bo‘lganini rad etdi. Yoqubning bayonotiga javob berar ekan, Pokiston TIV uning gaplaridan chuqur xavotir bildirdi.
“Afg‘oniston vazirining o‘zi tan olganidek, hech qanday dalillar bo‘lmagani holda bunday taxminiy da’volar qilish chuqur afsus uyg‘otadi va mas’uliyatli diplomatik hulq qoidalariga qarshi chiqadi”, — dedi muassasa vakili.
TIVda qayd etishlaricha, Pokiston barcha davlatlar suvereniteti va hududiy yaxlitligiga ishonishini tasdiqlaydi hamda terrorizmning har qanday ko‘rinishini qoralaydi. Islomobod toliblarni xalqaro majburiyatlar bajarilishini ta’minlashga va o‘z hududidan qaysidir mamlakatga qarshi terrorchilik maqsadlarida foydalanilishiga yo‘l qo‘ymaslikka chaqirdi.
“Tolibon” bir yil avval Amerika qo‘shinlari mamlakatdan olib ketilganidan keyin hokimiyat tepasiga kelgan edi. 2021-yil 15-avgust kuni toliblarning qurolli guruhlari Kobulga kirdi, sobiq prezident Ashraf G‘ani mamlakatdan qochib ketdi. Toliblar yangi hukumatni shakllantirdi, ammo hech bir mamlakat uni tan olmadi, harakatning o‘zi esa buning uchun kerak bo‘lgan barcha shartlar bajarilgan, deb hisoblaydi.
Izoh (0)