Vladimir Zelenskiy xavfsizlik kuchlari bilan yig‘ilish o‘tkazdi, u maxfiy tusga ega bo‘ldi, deb xabar beriladi Ukraina prezidenti saytida. Majlisda Ukraina Qurolli kuchlari, razvedka, Mudofaa vazirligi, IIV, Ukraina Xavfsizlik kengashi va “boshqa mudofaa kuchlari” rahbariyati qatnashdi.
“Maxfiy rejimda o‘tkazilgan yig‘ilish ishtirokchilari frontdagi tezkor vaziyat haqida ma’lumotlarni tingladi, xavfsizlik va mudofaa sohasidagi boshqa masalalarni ko‘rib chiqdi. Ukraina armiyasi ehtiyojlariga va Ukrainaning xalqaro sheriklari bilan turli darajalardagi koordinatsiyalarga alohida to‘xtalib o‘tildi”, — deyiladi xabarda.
Shuningdek, majlis davomida “oliy bosh qo‘mondonning dastlabki buyruqlari ijro etilishi” ko‘rib chiqildi.
Ukrainada operatsiya boshlanganidan buyon rossiyalik harbiylar Xerson viloyatini, Zaporojye viloyatining katta qismini, Xarkov viloyatining bir qismini, Donetsk viloyatining yarmini va butun Lugansk viloyatini nazorat ostiga oldi.
Kiyev may oyidan buyon ehtimoliy qarshi hujum haqida gapirmoqda. Dastlab Zelenskiyning ofisi mamlakat iyul boshigacha hujumga tayyor bo‘lishini aytgan bo‘lsa, iyul o‘rtalariga kelib, jangovar zirhli texnika va havo hujumiga qarshi mudofaa tizimlariga hamon ehtiyoj borligini ma’lum qilib, hozircha hujum qilolmasligini aytdi.
Ukraina mudofaa vaziri Aleksey Reznikov iyulda Zelenskiy qarshi hujum rejasini ishlab chiqishni topshirganini da’vo qilgandi. Mudofaa vazirligi Razvedka bosh boshqarmasi vakili Vadim Skibitskiy avgustda tayyorgarlik ishlari davom etayotganini ma’lum qildi.
Biroq The Washington Post gazetasi Ukraina hukumatining ismi oshkor etilmagan maslahatchisiga tayanib, Ukraina qarshi hujum uchun hozircha yetarli qurol-yarog‘ zaxirasiga ega emasligi haqida yozdi. “Avvalgidek, natijaga erishish mumkin, ammo shunday bo‘lsa, bu Rossiya bilan teng kuchli qarama-qarshilik emas, balki Ukrainaning oqilona strategiyasi natijasi bo‘ladi”, — dedi u.
Izoh (0)