Toshkent viloyati Ohangaron shahrida ota farzandi uchun aliment puli o‘rniga 2 xonali uy berdi. Bu haqda Majburiy ijro byurosi axborot xizmati xabar qildi.
Byuroning Ohangaron shahri bo‘limi ish yurituvida fuqarolik ishlari bo‘yicha Ohangaron tumanlararo sudining 2018-yildagi ijro hujjatiga asosan, qarzdor O‘.А.dan undiruvchi Z.А. foydasiga bir nafar voyaga yetmagan farzandi uchun ¼ qism miqdorida aliment undirish haqidagi ijro ishi mavjud bo‘lgan. Mazkur ijro hujjati bo‘yicha bo‘lim davlat ijrochilari tomonidan 4 yil davomida ijro harakatlari olib borilgan.
Qarzdorning taklifi va undiruvchining roziligi bilan qarzdor O‘.А.ga tegishli bo’lgan, Ohangaron shahrida joylashgan ko‘p qavatli uylardan 2 xonali xonadon qiz farzandi voyaga yetgunga qadar to‘lashi kerak bo‘lgan aliment hisobidan uning nomiga o‘tkazib berildi. Kelishuv notarial idorasi orqali rasmiylashtirilib, ijro hujjati amalda ish yurituvidan tamomlandi.
Izoh (0)