Namanganlik ota farzandi uchun aliment o‘rniga uch sotixli hovlini ajratib berdi
Namanganlik ota farzandi uchun aliment to‘lovi o‘rniga hovli ajratib berdi. Bu haqda “Daryo” muxbiri Azizbek Abduvaliyev xabar bermoqda.
Chortoq tumanida yashovchi Mirmuhsin O‘rozov (ism-sharif shartli) turmush o‘rtog‘i bilan ajrashganidan so‘ng bir nafar farzandi ona qaramog‘ida qolgandi. Fuqarolik ishlari bo‘yicha sud ko‘rsatmasiga ko‘ra bola uchun aliment undirilishi belgilanadi.
MIB Chortoq tuman bo‘limi xodimlari tomonidan Mirmuhsin O‘rozovga alimentni o‘z vaqtida to‘lash zarurligi yoki farzandi voyaga yetgunga qadar bir yo‘la to‘lab berishi mumkinligi tushuntirildi. Shundan so‘ng u bolasi 18 yoshga to‘lguncha bo‘lgan to‘lovlarni hisob-kitob qilib berishni so‘rab murojaat etdi. Davlat ijrochisi tomonidan bir nafar farzand uchun 2026-yilga qadar hisoblangan to‘lovlar 112 million so‘mni tashkil etdi.
“Mas’uliyatini anglagan ota farzandi uchun aliment mablag‘i o‘rniga 3 sotixdan iborat hovlini ajratib berdi”, — deyiladi MIB Namangan viloyat boshqarmasi xabarida.
Ma’lumot uchun, boshqarma tomonidan joriy yil 6 oyi davomida jami 44 milliard so‘m aliment pullari undirildi. Shuningdek, 1,8 milliard so‘m naqd pul, 287 million so‘mlik uy-joylar, 67 million so‘mlik transport vositasi aliment oluvchilarga oldindan to‘lov sifatida berilishi ta’minlandi.
Mavzuga doir: Marg‘ilonlik ota ikki nafar farzandi uchun aliment o‘rniga uy berdi
