Buxoroda ijtimoiy tarmoqlar orqali bir necha shaxslarni chuv tushirgan kiberfiribgar fosh etildi, deb xabar bermoqda Ichki ishlar vazirligi.
Jondor tumani Ichki ishlar bo‘limi tomonidan berilgan ma’lumotga ko‘ra, noma’lum shaxs tekin boylik orttirish maqsadida 2022-yil 27-may kuni Jondor tumani “Chorzona” mahallasida yashovchi, Y.M.ning plastik kartasidan 1 million so‘m, 2022-yil 19-iyun kuni Jondor tuman “Aleli” mahallasida yashovchi B.A.ning plastik kartasidan 800 ming so‘m, 2022-yil 21-iyun kuni shu tumanning “Dalmun” mahallasida yashovchi M.F.ning plastik kartasidan 800 ming so‘m pullarni aldov yo‘li bilan qo‘lga kiritgan.
Mazkur holatlar yuzasidan tuman Ichki ishlar bo‘limi tomonidan noma’lum shaxsga nisbatan Jinoyat kodeksining 168-moddasi (firibgarlik) 3-qismi bilan jinoyat ishi qo‘zg‘atilgan.
Tergov natijasida ushbu jinoyatlarni Andijon viloyati Baliqchi tumani “Nurafshon” mahallasida yashovchi Andijon davlat tibbiyot institutining Y.H. (1998-yilda tug‘ilgan) ismli talabasi sodir qilgani aniqlangan.
Hozirgi kunda ushbu shaxsning sodir etilib, fosh etilmasdan qolayotgan bu turdagi jinoyatlarga aloqadorligini aniqlash borasida tergov harakatlari davom ettirilmoqda.
Izoh (0)