Bosh prokuratura huzuridagi departament organlari tomonidan banklarning komplayens-nazorati tuzilmalari bilan hamkorlik doirasida pul mablag‘larining talon-toroj qilinishi bo‘yicha aniqlangan qonunbuzilish holatlari yuzasidan o‘z vaqtida qonuniy choralar ko‘rilmoqda.
Departamentning Kattaqo‘rg‘on tuman bo‘limi tomonidan hududiy tijorat banki filialining murojaatiga asosan o‘tkazilgan tergovga qadar tekshiruvda, “P.A.” MCHJ rahbari L.N. va fuqaro D.M. parrandachilikni rivojlantirish uchun ajratilgan 1,5 milliard so‘m kredit evaziga xarid qilingan parrandalarni va omuxta yem mahsulotlarini naqd pulga sotib yuborib, kredit mablag‘ini o‘zlashtirish yo‘li bilan talon-toroj qilgani aniqlangan.
Shu kabi, Buloqboshi tuman bo‘limi tomonidan o‘tkazilgan tergovga qadar tekshiruvda, fuqaro A.O. o‘zining va yaqin qarindoshlarining nomiga tashkil etilgan MCHJlarga hujjatlarni soxtalashtirish orqali shlakoblok ishlab chiqarish hamda avtomobillarga texnik xizmat ko‘rsatish dastgohlarini sotib olish uchun 1,4 milliard so‘m imtiyozli kredit ajratilishiga erishib, ushbu mablag‘larni o‘zlashtirish yo‘li bilan talon-toroj qilgani aniqlangan.
Pop tuman bo‘limi tomonidan o‘tkazilgan tergovga qadar tekshiruvda esa, Namangan tumanida joylashgan “I.Ya.” MCHJ rahbari U.X., MCHJ norasmiy rahbari A.X. hamda “Ye.” MCHJ ta’sischisi A.D. oldindan o‘zaro til biriktirib, issiqxona tashkil etish maqsadida qurilish materiallari sotib olish uchun ajratilgan kredit hujjatlarni qalbakilashtirib, 1 milliard so‘m kredit mablag‘ini o‘zlashtirish yo‘li bilan talon-toroj qilishgani aniqlangan.
Xuddi shunday, Termiz tuman bo‘limi tomonidan o‘tkazilgan tergovga qadar tekshiruvda, “T.A.” MCHJ rahbari N.B. korxonaga “Kattaqum” mahallasida joylashgan yer maydonida uzumchilik bog‘ini tashkil etish uchun ajratilgan 300 millin so‘m imtiyozli kredit uchun garovga qo‘yilgan mulklarni boshqa shaxslarga sotib yuborib, kredit mablag‘ini o‘zlashtirish yo‘li bilan talon-toroj qilgani aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Mavzuga doir: O‘zbekistonda kredit olish bo‘yicha kelib tushgan arizalarning 57 foizi qaytarilgani ma’lum qilindi
Izoh (0)