Buxoroda fuqaro MIB xodimini do‘pposlab, unga tan jarohati yetkazdi. Bu haqda “Daryo”ga MIBning viloyat boshqarmasi axborot xizmati rahbari Ixtiyor Olimov xabar berdi.
Ta’kidlanishicha, MIB ijrochisi Fuqarolik ishlari bo‘yicha Qorako‘l tumanlararo sudining 2022-yilning 2-avgustdagi da’voni ta’minlash to‘g‘risidagi ajrimiga asosan, qarzdor Z.A. xonadoniga borgan.
MIB xodimi qarzdor ota xonadoniga borib, uning voyaga yetmagan qizi fuqarolik ishi mazmunan ko‘rib chiqilgunga qadar onasi A.Q. tarbiyasiga olib berilishi to‘g‘risidagi ijro hujjatining mazmun-mohiyatini tushuntirishga uringan. Qarzdor esa hujjatlar bilan tanishish o‘rniga davlat ijrochisini haqoratlab, uni urib, do‘pposlab, tanasining turli qismlariga tan jarohati yetkazgan.
Mazkur holat yuzasidan Qorako‘l tuman prokuraturasi tomonidan Jinoyat kodeksining 219-moddasi 2-qismi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ish qo‘zg‘atilib, Z.A.ehtiyot chorasi sifatida qamoqqa olingan.
Izoh (0)