Бухорода фуқаро МИБ ходимини дўппослаб, унга тан жароҳати етказди. Бу ҳақда «Дарё»га МИБнинг вилоят бошқармаси ахборот хизмати раҳбари Ихтиёр Олимов хабар берди.
Таъкидланишича, МИБ ижрочиси Фуқаролик ишлари бўйича Қоракўл туманлараро судининг 2022 йилнинг 2 августдаги даъвони таъминлаш тўғрисидаги ажримига асосан, қарздор З.А. хонадонига борган.
МИБ ходими қарздор ота хонадонига бориб, унинг вояга етмаган қизи фуқаролик иши мазмунан кўриб чиқилгунга қадар онаси А.Қ. тарбиясига олиб берилиши тўғрисидаги ижро ҳужжатининг мазмун-моҳиятини тушунтиришга уринган. Қарздор эса ҳужжатлар билан танишиш ўрнига давлат ижрочисини ҳақоратлаб, уни уриб, дўппослаб, танасининг турли қисмларига тан жароҳати етказган.
Мазкур ҳолат юзасидан Қоракўл туман прокуратураси томонидан Жиноят кодексининг 219-моддаси 2-қисми (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иш қўзғатилиб, З.А.эҳтиёт чораси сифатида қамоққа олинган.
Изоҳ (0)