Shavkat Mirziyoyev 24-avgust kuni Samarqandda bir nechta xalqaro darajadagi tadbirlarga tayyorgarlik jarayonlari bilan tanishdi. Bu haqda Prezident matbuot xizmati xabar qildi.
Qayd etilishicha, Alisher Navoiy hamda Shohruh ko‘chalaridagi tarixiy binolarda millatlararo do‘stlik va xorijiy mamlakatlar bilan hamkorlikka bag‘ishlangan muzeylar tashkil etish rejalashtirilgan. Prezident bu rejalarni ma’qullab, muzeylarni mazmunan boyitish, hamkor mamlakatlar bilan yaqin munosabatlarni namoyon etish bo‘yicha ko‘rsatmalar bergan.
23-avgust kuni Samarqand tumanida “Buyuk ipak yo‘li” xalqaro turizm markazi ochilgan. Bu majmua yirik xalqaro anjumanlarga mezbonlik qiladi.
Davlat rahbari bu yerdagi Kongress xoll va mehmonxonalarda yaratilgan sharoitlar bilan tanishgan.
Mehmonxonalarning ikkitasi 5 yulduzli va oltitasi 4 yulduzli. Kongress xollning umumiy maydoni qariyb 6 ming kvadrat metr. U 3 ming 500 kishini qabul qilish quvvatiga ega. Anjumanlar vaqtida ishlarni samarali muvofiqlashtirish uchun situatsion markaz ham tashkil etilgan.
Prezident bu yerda xorijiy delegatsiyalar, ikki tomonlama uchrashuvlar uchun qulayliklarni oshirish bo‘yicha tavsiyalar bergan.
Shu bilan davlat rahbarining Samarqand viloyatiga tashrifi yakunlangan. Prezident Toshkentga qaytib kelgan.
Izoh (0)