Шавкат Мирзиёев 24 август куни Самарқандда бир нечта халқаро даражадаги тадбирларга тайёргарлик жараёнлари билан танишди. Бу ҳақда Президент матбуот хизмати хабар қилди.
Қайд этилишича, Алишер Навоий ҳамда Шоҳруҳ кўчаларидаги тарихий биноларда миллатлараро дўстлик ва хорижий мамлакатлар билан ҳамкорликка бағишланган музейлар ташкил этиш режалаштирилган. Президент бу режаларни маъқуллаб, музейларни мазмунан бойитиш, ҳамкор мамлакатлар билан яқин муносабатларни намоён этиш бўйича кўрсатмалар берган.
23 август куни Самарқанд туманида «Буюк ипак йўли» халқаро туризм маркази очилган. Бу мажмуа йирик халқаро анжуманларга мезбонлик қилади.
Давлат раҳбари бу ердаги Конгресс холл ва меҳмонхоналарда яратилган шароитлар билан танишган.
Меҳмонхоналарнинг иккитаси 5 юлдузли ва олтитаси 4 юлдузли. Конгресс холлнинг умумий майдони қарийб 6 минг квадрат метр. У 3 минг 500 кишини қабул қилиш қувватига эга. Анжуманлар вақтида ишларни самарали мувофиқлаштириш учун ситуацион марказ ҳам ташкил этилган.
Президент бу ерда хорижий делегациялар, икки томонлама учрашувлар учун қулайликларни ошириш бўйича тавсиялар берган.
Шу билан давлат раҳбарининг Самарқанд вилоятига ташрифи якунланган. Президент Тошкентга қайтиб келган.
Изоҳ (0)