Toshkent viloyati Yangiyo‘l tumanida tabiiy resurslardan noqonuniy foydalanib kelgan avtomobillarga gaz quyish shoxobchalari faoliyati fosh etildi. Bu haqda Iqtisodiy jinoyatlarga qarshi kurashish departamenti axborot xizmati xabar qildi.
Qayd etilishicha, Bosh prokuratura huzuridagi departamentning Toshkent viloyati boshqarmasi tomonidan tergovga qadar tekshiruvlar o‘tkazilgan. Unda Yangiyo‘l tumanida joylashgan “G.A.” va “N.M.” MCHJlarga qarashli avtomobillarga gaz to‘ldirish shoxobchasida o‘rnatilgan gaz hisoblagichlarga qasddan shikast yetkazilib, uskuna ko‘rsatkichlarini o‘zgartirish orqali tabiiy gazdan noqonuniy foydalanib kelingani oqibatida davlat va jamiyat manfaatlariga jami 2,3 milliard so‘m zarar yetkazilgani aniqlangan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)