Qoraqalpog‘istondagi voqealarni o‘rganish maqsadida tuzilgan komissiya a’zolari 23-avgust kuni shtabga kelgan fuqarolarning murojaatlarini qabul qildi. Bu haqda Oliy Majlisning inson huquqlari bo‘yicha vakili axborot xizmati xabar qildi.
Tashrif buyurgan murojaatchilar orasida ko‘plab fuqarolar xorijiy huquqni himoya qilish tashkilotlarining e’tibor markaziga tushgani va ba’zi yolg‘on xabarlarda nomlari keltirilgani holatlari haqida ma’lum qilgan.
Ta’kidlanishicha, Qoraqalpog‘istonda bo‘lib o‘tgan voqealarda ishtirok etganlikda gumon qilinib, olib ketilgan shaxslarning oila a’zolari bilan suhbat davomida ulardan ayrimlari ijtimoiy yordamga muhtoj ekanini bildirgan. Murojaatlar joyiga chiqib o‘rganilib, tegishli mutasaddi tashkilotlarga yozma murojaatlar yo‘llangan. Natijada komissiya tavsiyasiga ko‘ra, Mahalla va nuroniylarni qo‘llab-quvvatlash vazirligi tomonidan ushbu ehtiyojmand oilalarga birlamchi oziq-ovqat mahsulotlari yetkazib berilgan.
23-avgust kuni komissiya tomonidan hududdagi mahalla faollari hamda oliy ta’lim muassasalari mas’ul xodimlari va pedagoglari bilan uchrashuvlar o‘tkazilib, aholi kayfiyati o‘rganilgan. Shuningdek, Qoraqalpog‘istonda bo‘lib o‘tgan voqea va hodisalar yuzasidan anonim so‘rov o‘tkazilgan.
Mazkur so‘rovnomada Qoraqalpog‘istondagi namoyishlarni kelib chiqish sabablari, unga nisbatan huquqni muhofaza qiluvchi organlar tomonidan ko‘rilgan choralar, yaralanganlarga nisbatan ko‘rsatilgan tibbiy xizmat sifati, qiynoq va zo‘ravonlik hamda boshqa jihatlar qamrab olingan.
Izoh (0)