24-avgust kuni Oliy Majlis Qonunchilik palatasining navbatdagi majlisida deputatlar fuqarolarning ijtimoiy-iqtisodiy, huquqiy sohalardagi manfaatlarini ta’minlashga doir bir qator qonun va qaror loyihalarini ko‘rib chiqdi. Bu haqda quyi palata axborot xizmati xabar qildi.
Qayd etilishicha, xalq vakillari “Namangan viloyatining To‘raqo‘rg‘on tumani va Namangan shahri Davlatobod tumani, shuningdekб Namangan shahrining chegaralarini o‘zgartirish to‘g‘risida”gi Qonunchilik palatasi qarori loyihasini muhokama qilgan.
O‘zbekistonning 2022–2026-yillarga mo‘ljallangan taraqqiyot strategiyasida Namangan shahrini istiqbolda “bir millionlik shahar”ga, ya’ni megapolisga aylantirish, investitsiyaviy muhit yaxshilanishi natijasida xalqaro zamonaviy brendlar va yirik kompaniyalarning shaharga kirib kelishi, urbanizatsiya jarayonlari sezilarli darajada tezlashishi, shaharning “aqlli shahar” konsepsiyasi asosida boshqarish tizimi yaratilishi ko‘zda tutilgan. Shuningdek, Namangan shahrida bir yilda aholining o‘rtacha o‘sishi 30,3 ming kishini tashkil etishi hisobga olingan holda 2040-yilga kelib aholi soni tabiiy ravishda 1,2 million kishiga yetishi prognoz qilinmoqda.
Mazkur qaror bilan Namangan shahrini “millionli shahar”ga aylantirish maqsadida unga chegaradosh bo‘lgan To‘raqo‘rg‘on tumanidan472,4 gektar yer maydonini qo‘shib berish, hududda “Yangi Namangan shaharchasi” zamonaviy ishbilarmonlik markazi va turar joylar kompleksini tashkil etish ko‘zda tutilmoqda.
Qayd etilganidek, ushbu qarorning qabul qilinishi aholini munosib ish o‘rinlari bilan ta’minlash maqsadida shahardagi mavjud savdo va maishiy xizmat ko‘rsatish obyektlarida, shuningdek maydoni 164,2 gektar bo‘lgan 4 ta kichik sanoat zonasida 41,0 mingdan ortiq yangi ish o‘rinlarining yaratilishiga erishiladi.
“Tahlillarga ko‘ra, ‘millionli shahar’larda boshqa shaharga nisbatan iqtisodiy o‘sish darajasi yuqori bo‘ladi va aholi jon boshiga daromad tez o‘sadi. Iqtisodiy tarmoqlar diversifikatsiyasi kuchayadi hamda tarmoq klasterlarini tashkil qilish mumkin bo‘ladi. Ayniqsa, ‘millionli shahar’lar mamlakat YAIMni o‘sishida drayver vazifasini bajaradi”, — deyiladi xabarda.
Ta’kidlanishicha, majlisda qaror loyihasi qabul qilingan.
Izoh (0)