O‘zbekistonda qulupnayni yil bo‘yi yetishtirish bo‘yicha Koreya texnologiyasi paydo bo‘ladi, deb xabar bermoqda Qishloq xo‘jaligi vazirligi matbuot xizmati.
Ma’lum qilinishicha, 22-avgust kuni Qishloq xo‘jaligi vazirligida Koreya qishloq birlashmasi korporatsiyasi (KRC), Oziq-ovqat, qishloq xo‘jaligi, o‘rmon xo‘jaligi va baliqchilik sohalarida ta’limni rivojlantirish va axborot xizmati bo‘yicha Koreya agentligi (EPIS) vakillari bilan uchrashuv bo‘lib o‘tdi.
Tomonlar mavjud va rejalashtirilgan qo‘shma loyihalar doirasida hamkorlikni rivojlantirish masalalarini muhokama qilgan.
Uchrashuvda Qishloq xo‘jaligi vazirligi va EPIS o‘rtasida yangi loyihani boshlash bo‘yicha kelishuv imzolangan. “Yil bo‘yi qulupnay yetishtirish bo‘yicha zamonaviy Koreya texnologiyalarini joriy etish” nomli ushbu loyiha Janubiy Koreya hukumatining rivojlanish bo‘yicha rasmiy ko‘magi (ODA) yo‘nalishida taqdim etiladigan grant mablag‘lari hisobiga moliyalashtiriladi.
3,7 million AQSH dollari qiymatidagi loyiha 2026-yil dekabr oyiga qadar amalga oshiriladi.
Shu maqsadda Qishloq xo‘jaligi vazirligi huzuridagi Agroxizmatlar markazi (Toshkent viloyati, Yuqorichirchiq tumani) hududida quyosh batareyalarida ishlaydigan qulupnay yetishtiruvchi zamonaviy issiqxona quriladi. Bundan tashqari, koreyalik mutaxassislar tomonidan ko‘chatlar uchun issiqxona hamda yuqori sifatli qulupnay ko‘chatlarini yetishtirish bo‘yicha in vitro laboratoriyasi qurilib, jihozlanadi.
Ta’kidlanishicha, loyiha o‘zbek qulupnay mahsulotlarini ichki va tashqi bozorlarda brendingi va marketingiga ko‘maklashadi.
Izoh (0)