Ijtimoiy tarmoqlarda “Lukoyl ishchilarga mehnat ta’tili bermayapti” nomli xabar tarqalgandi. Bandlik va mehnat munosabatlari vazirligi holat yuzasidan ma’lumot berdi.
Qayd etilishicha, Buxoro viloyati bandlik bosh boshqarmasi davlat mehnat inspeksiyasi ushbu holatni o‘z nazoratiga oldi, o‘rganish natijalari haqida qo‘shimcha axborot beriladi.
Ma’lumot uchun, murojaat deputat Rasul Kusherbayevga yuborilgan hamda u Bandlik va mehnat munosabatlari vazirligidan masalani o‘rganib chiqishlarini so‘ragan edi. Murojaat matni quyida to‘liq keltiriladi.
Assalomu alaykum, hurmatli Rasul Kusherbayev. Ism-familiyamni anonim saqlang, e’lon qilmang. Men “Lukoil Uzbekistan Operating Company” Hauzak konida ishlayman. Men mehnat qilayotgan Nazorat-o‘lchov asboblari va avtomatikasi metrologiya xizmati ishchi xodimlariga 3 yildan buyon mehnat ta’tili berilmaydi. Biz vaxta rejimida 14/14 kundan xavfli, zaharli obyektlarda ishlaymiz. Mehnat ta’tili esa dam olish kunlarimizga beriladi.Mehnat qonunchiligida mehnat ta’tili berilishi majburiy ekani belgilab qo‘yilgan bo‘lsa ham, rossiyalik boshliqlarimiz N.V.Semyonov va D.V.Politov ishchilarga ta’til bermayapti. Qolaversa, boshqa sohalarda ishlaydigan ishchilarga 1 smena uchun 11 soat tabelga qo‘yilib, mehnat ta’tili ham berilib, 42 kun dam oladi.
Bizning ishchilariga 1 smena uchun 10,5 soat tabelga soat qo‘yiladi. Boshliqlarga yozma murojaat qilganimizda sizlar 10,5 soatni ham oqlamayapsizlar, yoqmasa, arizangni yoz, deb javob qaytarishyapti. Sizdan iltimos, murojaatimizni befarq qoldirmang. Biz ham boshqalar singari ta’tilga chiqib, dam olishni xohlaymiz, — deyiladi anonim murojaatda.
Izoh (0)